ᓇᐅᔮᑦ ᐅᐱᕐᖔᒃᑯᑦ ᓯᕿᓐᓂᖅᑐᖅ
ᖃᖓᑦᑕᖅᑎᑕᐅᓯᒪᔪᒃᑯᑦ ᐱᔨᑦᓯᕋᐅᑏᑦ ᓱᒃᑲᔪᑦ ᐃᑭᐊᖅᑎᔾᔪᑎᓄᑦ ᐊᖅᑯᑏᑦ ᑲᑦᑐᒪᐅᑎᒋᔭᐅᔪᑦ ᓄᓇᓕᓕᒫᓄᑦ.
ᐃᓄᐃᑦ ᐃᓅᓱᑦᑐᑦ ᖃᕆᓴᐅᔭᕋᔪᓲᖑᔪᑦ ᐊᔪᓐᖏᓯᐊᖅᑐᑎᒃ ᐃᑭᐊᖅᑭᔾᔪᑎᓂᒃ (ᑑᕆᔅ ᒪᑭᓐᓕ ᐊᔾᔨᓕᐅᒐᖓ)
ᐱᔨᑦᓯᕋᐅᑏᑦ
ᐃᑭᐊᖅᑭᔾᔪᑏᑦ
ᓱᒃᑲᔪᑦ ᐅᐊᔭᖃᓐᖏᑦᑐᑦ ᐃᑭᐊᖅᑭᔾᔪᑏᑦ ᐊᑐᐃᓐᓇᐅᔪᑦ ᓄᓇᓕᓕᒫᓂ. ᐊᑐᐃᓐᓇᐅᑎᑦᓯᖃᑕᐅᓲᖑᔪᑦ ᓂᐊᑦᑳᔅᑕ, ᓄᐊᔅᕕᔅᑎᐊ ᐊᒻᒪᓗ ᕿᓂᖅ (ᓄᓇᓕᓕᒫᓂ ᐊᑐᖅᑕᐅᔪᖅ). ᐃᖅᑲᓇᐃᔭᖃᑎᓐᓂᒃ ᖃᐅᔨᒋᐊᕐᓗᑎᑦ ᓇᓕᖏᑦ ᐊᑐᐃᓐᓇᐅᒻᒪᖔᑕ ᓄᓇᒋᔭᑦᓯᓐᓂ.
ᓯᒻᐹᑎᑯ ᐊᑐᐃᓐᓇᐅᑎᑦᓯᒻᒥᔪᖅ ᐅᖓᓯᑦᑐᒨᕈᓐᓇᐅᑎᖃᕆᐊᓕᒻᒥ ᓇᕿᑦᑕᒐᕐᒥ ᐊᕐᕕᐊᓂ, ᑭᓐᖓᐃᑦ, ᐃᒡᓗᓕᒑᕐᔪᒃ, ᑲᖏᖅᑐᒑᐱᒃ, ᓴᓪᓕᖅ, ᐊᐅᓱᐃᑦᑐᖅ, ᓴᓂᕋᔭᒃ, ᐃᒡᓗᓕᒃ, ᐃᖃᓗᐃᑦ, ᑭᒻᒥᕈᑦ, ᐸᓐᓂᖅᑑᖅ, ᒥᑦᑎᒪᑕᓕᒃ, ᕿᑭᖅᑕᕐᔪᐊᖅ, ᓇᐅᔮᑦ ᐊᒻᒪᓗ ᑎᑭᕋᕐᔪᐊᖅ.
ᐃᑭᐊᖅᑭᔾᔪᑏᑦ
ᑲᐃᕘᖃᕈᓐᓇᐅᑎᖃᕈᓐᓇᖅᑐᓕᒫᑦ ᓄᓇᓖᑦ ᑯᐊᐸᖏᑎᒍᑦ. ᐊᐱᕆᓗᑎᑦ ᑲᐃᕗᑦ ᒥᑦᓵᓄᑦ ᐊᒻᒪᓗ ᑕᖅᑭᑕᒫᖅ ᐊᑭᒋᓲᖓᓂᒃ. ᐅᖃᖃᑎᒋᓗᒋᑦ ᐃᖅᑲᓇᐃᔭᖃᑎᒋᔭᑎᑦ, ᐊᐱᕆᔪᒪᓇᔭᖅᑐᒃᓴᐅᔪᑎᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᒃᑯᑦ ᑕᑯᓐᓇᕈᓐᓇᐅᑎᖃᕈᓐᓇᕐᒪᖔᑕ ᓄᓇᓕᓐᓂ.
ᖃᖓᑦᑕᖅᑎᑕᐅᓯᒪᔪᒃᑯᑦ ᑕᑯᓐᓇᕈᓐᓇᐅᒻᒥᒃ ᐊᓪᓕᕋᐅᔭᖅᑖᕈᒪᒍᕕᑦ, ᖃᐅᔨᒋᐊᕐᕕᒋᓗᒍ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᓕᕆᔨ ᑲᑉᐳᔾᔭᐅᓂᖓᓄᑦ ᐊᒻᒪ ᐊᖏᓂᖓᓂᒃ ᐊᓪᓕᕋᐅᔭᖅᑖᕆᒋᐊᓕᕕᑦ. ᐃᓚᖏᓐᓂ ᓄᓇᓕᓐᓂ, ᕕᐅᓪ ᐃᒃᓯᕗᕆᔅᕕᐅᓪ (Bell ExpressVu) ᐊᓪᓕᕋᐅᔭᖅ ᐱᐅᓂᖅᐹᖑᓲᖑᔪᖅ, ᐊᒻᒪᓗ ᐊᓯᖏᓐᓂ ᓄᓇᓕᓐᓂ, ᓯᑖ ᓱᐃᔅ (Star Choice) ᐱᐅᓂᖅᐸᐅᓪᓗᓂ. ᐊᐱᕆᓗᑎᑦ ᓇᓕᐊᓐᓂᒃ ᓂᐅᕕᕈᕕᑦ ᐱᐅᓂᖅᐸᐅᓇᔭᕐᒪᖔᖅ ᓄᓇᑦᓯᓐᓂ.
ᐃᓘᓐᓇᑲᓵᑎᒃ ᓄᓇᓖᑦ ᓈᓚᐅᑎᐊᓛᓖᑦ. ᑕᒪᒃᑯᐊ ᐊᐅᓚᑕᐅᒐᔪᑦᑐᑦ ᓄᓇᖃᖅᑐᓄᑦ ᓈᓚᐅᓯᓕᕆᔨᓄᑦ ᐅᕝᕙᓘᓐᓃᑦ ᓈᓚᐅᓯᓕᕆᔨᒃᑯᑦ ᓴᓴᐃᔭᑎᖏᓐᓄᑦ. ᑐᓴᒐᑦᓴᑦ, ᓂᔾᔭᐅᑏᑦ, ᓈᓚᐅᑎᒃᑯᑦ ᕖᓐᖒᕐᓃᑦ ᐊᒻᒪᓗ ᐃᓱᒪᒋᕙᐅᔪᑦ ᓄᓇᓕᓐᓄᑦ ᑐᓴᖅᓴᐅᑎᑕᐅᖃᑦᑕᓲᖑᔪᑦ.
ᐊᒻᒪᓗᑦᑕᐅᖅ, ᓰᐲᓰᒃᑯᑦ ᐊᔾᔨᒌᓐᖏᑦᑐᓂᒃ ᑐᓴᕋᓐᓈᑎᑦᓯᖃᑦᑕᓲᑦ. ᓰᐲᓰᒃᑯᑦ ᐱᕙᓪᓕᐊᔪᓕᕆᕕᖃᐅᖅᑐᑦ ᐃᖃᓗᑦᑑᑦᑎᐊᒥ (ᕿᑎᕐᒥᐅᑦ) ᐊᒻᒪᓗ ᑲᖏᕐᖠᓂᕐᒥ (ᑭᕙᓪᓕᖅ). ᓰᐲᓰ ᓄᓇᕗᑦ ᐃᖃᓗᓐᓂ ᑐᓴᖅᓴᐅᑎᑕᐅᖃᑦᑕᓲᖅ. ᐊᓯᖏᓐᓂᒃ ᓈᓚᐅᑎᖃᐅᕐᒥᔪᖅ ᓇᖕᒥᓂᕆᔭᐅᔪᓂᒃ ᐃᖃᓗᓐᓂ.
Sirius ᐊᒻᒪᓗ XM ᖃᖓᑦᑕᖅᑎᑕᐅᓯᒪᔪᒃᑯᑦ ᐊᓪᓕᕋᐅᔭᓖᑦ ᓈᓚᐅᑎᖃᕐᒥᔪᑦ.
ᐅᖄᓚᐅᑦ
ᓄᓇᓕᓕᒫᑦ ᐅᖄᓚᐅᑎᓄᑦ ᐱᔨᑦᓯᕋᐅᑎᓖᑦ. ᐅᔾᔨᕈᓱᒋᐊᕆᐊᖃᖅᑐᑎᑦ ᐅᖄᓚᐅᑏᑦ ᐊᑐᖅᑕᐅᓲᖑᒻᒪᑕ ᖃᖓᑦᑕᖅᑎᑕᐅᓯᒪᔪᒃᑯᑦ, ᑕᐃᒫᒃ ᑭᖑᕙᓯᖃᑦᑕᓲᖑᔪᖅ ᐅᖄᓚᓂᕆᔭᐃᑦ ᐅᖓᓯᑦᑐᒧᑦ ᐅᖄᓚᑎᓪᓗᑎᑦ.
ᓄᐊᔅᕕᔅᑎᐊ ᐅᖓᓯᑦᑐᒧᑦ ᐅᖄᓚᒍᓐᓇᑎᖃᖅᑎᑦᓯᒻᒥᔪᖅ ᐊᑭᑭᓪᓕᒋᐊᖅᓯᒪᔪᓐᓇᖅᑐᓂᒃ. ᐃᑲᔪᖅᑕᐅᖁᓪᓗᑎᑦ ᓇᓕᐊᓐᓂᒃ ᐊᑐᕐᓂᐊᕐᒪᖔᖅᐱᑦ ᐊᑭᑭᓪᓕᒋᐊᖅᓯᒪᒍᓐᓇᐅᑎᒥᒃ ᐃᓕᓐᓄᑦ ᓈᖕᒪᓂᖅᐹᒥᒃ, “ᐅᖓᓯᑦᑐᒧᑦ ᐅᖄᓚᖃᑦᑕᓂᕐᒧᑦ ᓈᓴᐃᔾᔪᑎᓂᒃ” ᖃᕆᓴᐅᔭᒃᑯᑦ ᐃᑭᐊᖅᑭᔾᔪᑎᒃᑯᑦ ᐊᑐᕈᓐᓇᕐᒥᔪᑎᑦ ᐃᖕᒥᒨᖓᔪᓂᒃ ᐅᖓᓯᑦᑐᒧᑦ ᐅᖄᓚᒍᓐᓇᐅᑏᑦ ᐊᑭᑭᓪᓕᒋᐊᖅᓯᒪᔪᑦ.
ᑖᓐᓇ ᑎᑎᕋᖅᑕᐅᔪᖅ ᐸᐃᑉᐹᒨᖅᑲᖅᑕᐅᓕᖅᑎᓪᓗᒍ, ᐃᑉᐱᐊᔪᒻᒥᒐᐃᑦ ᐅᖄᓚᐅᑏᑦ (ᕕᐅᓪ) ᐃᖃᓗᓐᓃᓐᓇᖅ ᐊᑐᖅᑕᐅᔪᓐᓇᓚᐅᖅᑐᖅ ᐊᒻᒪᓗ ᑲᖏᕐᖠᓂᕐᒥ. ᖃᐅᔨᒋᐊᖅᑳᕐᓗᑎᑦ ᐅᑭᐅᖅᑕᖅᑐᒧᐊᓐᖏᓂᕐᓂ ᖃᓪᓗᓈᓂ ᐃᑉᐱᐊᔪᒻᒥᒐᑦ ᐊᑐᖃᑦᑕᓲᕆᔭᑦ ᐊᑐᕈᓐᓇᕐᒪᖔᖅ ᓄᓇᕗᒻᒥ.
ᓂᐅᕕᕐᕖᑦ
ᓂᐅᕕᕐᕖᑦ ᓄᓇᓕᓕᒫᑲᓴᓐᓂ ᐱᑕᖃᓗᐊᕌᓗᓐᖏᑦᑐᑦ. ᓄᓇᓕᓕᒫᑦ ᓂᐅᕕᖅᑎᒃᑯᓖᑦ ᐅᕝᕙᓘᓐᓃᑦ ᑯᐊᐸᒃᑯᓐᓂ ᑕᒪᒃᑮᓂᓪᓘᓐᓃᑦ. ᓂᐅᕕᕐᕕᖏᑦ ᓂᐅᕕᐊᒃᓴᖃᓲᑦ ᓂᕿᓂᒃ, ᐃᓪᓗᓯᐅᑎᓂᒃ, ᐊᓐᓄᕌᓂᒃ ᐃᓘᓐᓇᐃᓐᓄᑦ, ᐊᑎᒋᓂᒃ, ᑲᒥᓐᓂᒃ, ᐃᓪᓗᓯᐅᑎᕋᓛᓂᒃ, ᓂᕐᕆᑎᓂᒃ ᐊᒻᒪᓗ ᑲᑭᐊᒐᓚᓐᓂᒃ, ᐱᓐᖑᐊᓂᒃ, ᐋᓐᓂᐊᒌᒃᑯᑎᓂᒃ, ᐊᓇᕐᕕᒃᓯᐅᑎᓂᒃ ᐊᒻᒪᓗ ᐊᓯᖏᓐᓂᒃ ᓂᐅᕕᐊᒃᓴᓂᒃ. ᑭᓯᐊᓂᓕ ᐱᔪᒪᔭᒥᒃ ᐃᓱᒪᖅᓱᕕᒃᓴᐅᓗᐊᓐᖏᑦᑐᖅ ᐊᒻᒪ ᐊᑭᑐᓂᖅᓴᒻᒪᕆᐊᓘᒍᓐᓇᖅᑐᑦ ᐊᔾᔨᖏᓐᓂ ᓂᐅᕕᕐᕕᖕᓂ ᖃᓪᓗᓈᓂᒃ.
ᓄᓇᖃᖅᑐᑦ ᐊᑐᖅᑐᒻᒪᕆᐊᖃᑦᑕᖅᑐᖅ ᖃᕆᓴᐅᔭᒃᑯᑦ ᑎᑭᓴᐃᒍᑎᓂᒃ ᐃᑭᐊᖅᑭᔾᔪᑎᒃᑯᑦ, ᐊᑐᕐᖢᑎᒃ “ᓂᖀᑦ ᖃᖓᑕᓲᒃᑰᖅᑎᑕᐅᖃᑦᑕᕐᓂᖏᓐᓂᒃ” ᐊᑭᑭᓪᓕᒋᐊᖅᓯᒪᒍᑕᐅᔪᓐᓇᖅᑐᒥᒃ ᐊᒻᒪᓗ ᐊᕐᕌᒍᑕᒫᖅ “ᐅᒥᐊᕐᔪᐊᒃᑯᑦ” ᑎᑭᓴᐃᖃᑦᑕᓂᕐᒥᒃ ᑕᒪᐅᓇ ᐅᓯᔭᐅᔾᔪᑎᖏᑦ ᐊᑭᑭᓪᓕᕚᓪᓕᖅᓯᒪᖃᑦᑕᓲᖑᔪᑦ ᐊᒻᒪᓗ ᐊᕐᕌᒍᒧᑦ ᓈᖕᒪᑦᑐᓂᒃ ᑎᑭᓴᐅᖃᑦᑕᓲᖑᔪᑦ.
ᐃᓱᓕᑦᑕᕐᕕᖃᓐᖏᑦᑐᑦ ᐊᒻᒪᓗ ᐃᓱᓕᑦᑕᕐᕕᓖᑦ ᐃᖅᑲᓇᐃᔭᖅᑏᑦ ᐊᑐᕈᒪᓇᔭᖅᑐᒃᓴᐅᔪᑦ ᐅᑯᓂᖓ:
1. ᖃᖓᑕᓲᒃᑯᑦ ᑎᑭᓴᐃᓂᖅ ᓂᕿᓂᒃ - ᐊᑭᑭᓪᓕᒋᐊᖅᓯᒪᔪᒃᑯᑦ ᐱᕈᖅᑐᒥᓂᕐᓂᒃ ᐊᒻᒪᓗ ᐃᓚᖏᑦ ᓂᖀᑦ ᐱᕈᖅᑐᒥᓂᐅᓐᖏᑦᑐᑦ ᐅᓯᔭᐅᔾᔪᑎᖏᑦ ᐊᑭᑭᓪᓕᒋᐊᖅᓯᒪᑎᓪᓗᒋᑦ ᑎᑭᓴᐃᕕᑦᓴᐅᓲᖅ ᐊᖏᔫᑕᐅᓂᖅᓴᓂ ᓄᓇᓂᒃ ᓲᕐᓗ ᐅᐃᓂᐱᒡ, ᐋᑐᕚ ᐅᕝᕙᓘᓐᓃᑦ ᔭᓗᓇᐃᕝᒥᒃ.
ᖃᐅᔨᒋᐊᕐᕕᒋᔪᓐᓇᖅᑕᑎᑦ ᐃᖅᑲᓇᐃᔭᖃᑎᑎᑦ ᐊᑎᕐᓂᒃ ᐊᒻᒪᓗ ᓇᓂ ᓂᐅᕕᕐᕕᖕᓂᒃ ᑎᑭᓴᐃᕕᒃᓴᐅᒻᒪᖓᖅ ᐊᑭᑭᓪᓕᒋᐊᖅᓯᒪᔪᒃᑯᑦ ᐅᓯᔭᐅᔾᔪᑎᖃᕈᓐᓇᖅᑐᓂᒃ ᓂᕿᓂᒃ ᑎᑭᓴᐃᓗᓂ ᓄᓇᑦᓯᓐᓄᑦ. ᖃᐅᔨᒋᐊᕐᕕᒋᓗᒋᑦ ᓂᐅᕕᕐᕖᑦ ᐊᑐᐃᓐᓇᕆᔭᖏᓐᓂᒃ ᓂᐅᕕᐊᒃᓴᓂᒃ ᐊᒻᒪᓗ ᐊᑭᖏᓐᓂᒃ ᐅᓯᔭᐅᔾᔪᑎᖏᓐᓄᑦ. ᑕᒪᕐᒥᒃ ᓂᕿᓂᒃ ᑎᑭᓵᖑᔪᑦ ᐊᑭᓕᖅᓯᒫᓂᒋᐊᓖᑦ.
2. ᐅᒥᐊᕐᔪᐊᒃᑯᑦ ᑎᑭᓴᐃᓂᖅ - ᑎᑭᓴᕐᓗᒋᑦ ᖃᑦᑖᔪᒻᒥᐅᑕᑦ, ᐸᓂᖅᑐᑦ ᐊᒻᒪᓗ ᖁᐊᑦ ᓂᖀᑦ ᐅᓯᔭᐅᔪᓐᓇᖅᑐᑦ ᓄᓇᑦᓯᓐᓄᑦ ᐊᐅᔭᒃᑯᑦ. ᑕᑯᒋᐊᕐᓗᒋᑦ “ᐅᒥᐊᕐᔪᐊᒃᑯᑦ / ᓯᑲᐅᒃᑯᑦ ᑎᑭᓴᐃᒍᑏᑦ” ᐊᑖᓂ ᑎᑎᕋᖅᓯᒪᔪᑦ ᑐᑭᓯᒋᐊᒃᑲᓐᓂᕈᑎᒃᓴᑦ.
ᓂᐅᕕᖃᑦᑕᕈᓐᓇᕐᒥᔪᑎᑦ ᓂᕿᓂᒃ ᓂᐅᕕᖅᑎᑯᓐᓂ, ᓄᐊᔅᒫᑦᒥᒃ ᐅᕝᕙᓘᓐᓃᑦ ᑯᐊᐸᓂᒃ. ᐅᓄᖅᑐᑦ ᓄᓇᓖᑦ ᑕᒪᒃᑮᓐᓂᒃ ᓂᐅᕕᕐᕕᖃᕋᔪᑦᑐᑦ ᓂᐅᕕᖅᑎᑯᓐᓂᒃ ᑯᐊᐸᒃᑯᓂᓪᓗ. ᓂᖀᑦ ᓇᑦᓴᖅᑕᑎᑦ ᑎᑭᒍᕕᑦ ᐱᖁᑎᒋᓗᒋᑦ ᑭᖑᓪᓕᐅᑐᐃᓐᓇᕆᐊᓖᑦ ᐃᑭᕕᒋᔭᕐᓂ ᖄᖏᐅᑎᒍᑕᐅᑉᐸᑕ ᓇᑦᓴᖅᑕᐅᔪᓐᓇᖅᑐᓄᑦ ᐅᕝᕙᓘᓐᓃᑦ ᐅᖁᒪᐃᓗᐊᖅᐸᑕ ᐱᖁᑎᒋᓗᒍ. ᑖᒃᑯᐊ ᐊᑭᓕᒃᑲᓐᓂᑐᐃᓐᓇᕆᐊᓕᑎᑦ ᖄᖓᒍᑦ ᐅᓯᔭᐅᔾᔪᑎᖏᓐᓄᑦ ᖃᖓᑕᓲᒃᑯᑦ.
ᓂᖀᑦ ᓄᓇᒦᓐᖔᖅᑐᑦ (ᑕᐃᔭᐅᒐᔪᑦᑐᑦ “ᐃᓄᖕᓄᑦ ᓂᕿᒋᔭᐅᔪᑦ”), ᓲᕐᓗ ᑐᑦᑐᑦ, ᐅᒥᕐᒪᑦ, ᐃᖃᓗᒃ ᐊᒻᒪᓗ ᑎᖕᒥᐊᑦ ᓂᐅᕕᐊᒃᓴᐅᓚᐅᓪᓚᓲᖑᒻᒥᔪᑦ ᓄᓇᓕᓐᓂ ᑭᓯᐊᓂᓕ ᓂᕿᓕᕝᕕᖕᓂ ᑲᒪᒋᔭᐅᓯᒪᒐᔪᐃᑦᑐᑦ. ᐃᓚᐃᓐᓇᖏᑦ ᓄᓇᓖᑦ ᓂᕿᓕᕆᕝᕕᓖᑦ.
ᐊᐅᓪᓚᖃᑦᑕᕐᓂᖅ
ᐊᐅᓪᓚᖃᑦᑕᕐᓂᖅ ᐊᕐᕕᖅᑕᕐᓂᖅ ᓄᓇᓕᖕᓄᑦ ᖃᖓᑕᓲᒃᑯᑦ ᐊᒻᒪᓗ ᐊᐅᓪᓚᕈᒪᓯᑲᓪᓚᒃᑯᕕᑦ ᑕᕝᕙᐃᓐᓇᖅ ᐊᑭᑐᔪᕐᔪᐊᕌᓘᒍᓐᓇᖅᑐᖅ. ᓄᓇᖃᖅᑐᑦ ᐸᕐᓇᑦᓯᐊᖅᓯᒪᔭᕆᐊᖃᓲᑦ ᐊᐅᓪᓚᕐᕕᒋᓂᐊᖅᑕᒥᓂᒃ ᓯᕗᓂᑐᖃᑲᓪᓚᖓᓂ ᐊᒻᒪᓗ ᐊᑭᑭᓐᓂᖅᐹᖑᔪᓐᓇᖅᑐᓂᒃ ᖃᖓᑦᑕᐅᑎᓂᒃ.
ᓯᓚᖓ ᐱᔾᔪᑕᐅᒐᔪᑦᑐᖅ ᐅᑭᐅᖅᑕᖅᑐᒥ ᐊᐅᓪᓚᖃᑦᑕᕐᓗᓂ ᐊᒻᒪᓗ ᖃᖓᐅᓕᕌᖓᑦ ᐊᐅᓪᓚᖃᑦᑕᖅᑐᑦ ᖃᐅᔨᓲᖑᕗᑦ ᐱᕝᕕᖃᑦᓯᐊᕆᐊᖅᓯᒪᔭᕆᐊᖃᕐᓂᕐᒥᒃ ᐸᕐᓇᓯᒪᑦᓯᐊᕐᓗᓂ ᖃᓪᓗᓈᓄᑦ ᖃᖓᑕᓲᓂᒃ ᐊᓯᔾᔨᖃᑦᑕᕆᐊᖃᕐᓂᕐᒧᑦ.
ᐃᓕᓐᓂᐊᕐᓂᖅ
ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃ (ᓯᓚᑦᑐᓴᕐᕕᒃ) ᐃᓕᓐᓂᐊᕐᕕᖃᐅᖅᑐᖅ ᐃᖃᓗᓐᓂ, ᐃᖃᓗᑦᑑᑦᑎᐊᒥ ᐊᒻᒪᓗ ᑲᖏᕐᖠᓂᕐᒥ. ᑐᖅᑲᑕᕐᕕᒋᔭᐅᓪᓗᓂ ᓯᓚᑦᑐᓴᕐᕕᖕᒧᑦ ᐊᕐᕕᐊᑦ. ᓯᓚᑦᑐᓴᕐᕕᒃ ᒪᓂᒪᑎᑦᓯᖃᑦᑕᓲᖅ ᖃᓄᐃᑦᑐᑐᐃᓐᓇᕐᓂᒃ ᐋᓐᓂᐊᖅᑐᓕᕆᓂᕐᒧᑦ ᐃᖢᐊᖅᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᐃᓚᒋᔭᐅᓪᓗᑎᒃ ᐃᓱᒪᓕᕆᔨᐅᒋᐅᖅᓴᕐᓂᖅ, ᐃᓄᓕᕆᓂᖅ ᐊᒻᒪᓗ ᐃᕐᓂᓱᑦᓰᔨᐅᓂᖅ, ᐃᓚᐃᓐᓇᖏᑦ ᑖᒃᑯᐊ.
ᓯᓚᑦᑐᓴᕐᕕᒃ ᒪᓂᒪᑎᑦᓯᖃᑦᑕᓲᖑᒻᒥᔪᖅ ᓇᓗᓇᐃᒃᑯᑕᖅᑖᕈᑎᒃᓴᓂᒃ ᐊᒻᒪᓗ ᐃᓕᓴᕆᔭᐅᓯᒪᔾᔪᑎᒻᒪᕆᓐᓄᑦ ᖁᑦᓯᓂᖅᐹᓂᒃ ᐋᓐᓂᐊᓯᐅᖅᑎᐅᓂᕐᒧᑦ ᐊᒻᒪᓗ ᐃᓕᓴᐃᔨᐅᓂᕐᒧᑦ. ᓯᓚᑦᑐᓴᕐᕕᒃ ᑲᑐᔾᔨᖃᑎᖃᖃᑦᑕᓲᖑᔪᖅ ᒪᕐᕉᓐᓂᒃ ᐃᓕᓐᓂᐊᕕᔾᔪᐊᓐᓂᒃ ᒪᓂᒪᑎᑕᒥᒍᑦ ᐃᓕᓐᓂᐊᒐᒃᓴᑦᑎᒍᑦ (ᕆᔭᐃᓇᐅᑉ ᐃᓕᓐᓂᐊᕕᔾᔪᐊᖓ) ᐊᒻᒪᓗ ᐋᓐᓂᐊᓯᐅᖅᑎᒃᓴᐅᓂᕐᒧᑦ (ᑕᐅᕼᐊᐅᓯ ᐃᓕᓐᓂᐊᕕᔾᔪᐊᖓ).
24-ᖑᔪᑦ ᓄᓇᓕᓐᓂ ᐃᓐᓇᕐᓄᑦ ᐃᓕᓐᓂᐊᕐᕖᑦ ᓄᓇᓕᖏᓐᓃᑦᑐᑦ ᓄᓇᕗᒻᒥ. ᐊᐅᓚᑕᐅᓪᓗᑎᒃ ᓯᓚᑦᑐᓴᕐᕕᒃᑯᑦ. ᐃᓕᓐᓂᐊᒐᒃᓴᐅᑎᑕᐅᕙᑦᑐᑦ ᖃᐅᔨᒃᑲᓐᓂᖁᓪᓗᒋᑦ ᖃᐅᔨᒪᓂᕆᐊᓂᒃᑕᖏᑕ ᖄᖓᒍᑦ, ᐊᔪᓐᖏᓐᓂᕆᔭᐅᔪᑦ ᐊᒻᒪᓗ ᐃᓕᖅᑯᓯᕆᔭᕆᐊᓕᖏᑦ ᐃᖅᑲᓇᐃᔭᕈᓐᓇᖁᓪᓗᒋᑦ ᐊᒻᒪᓗ ᐃᓕᓐᓂᐊᑲᓐᓂᕈᓐᓇᖁᓪᓗᒋᑦ.
ᐊᒻᒪᓗᑦᑕᐅᖅ ᐃᓕᓐᓂᐊᕕᔾᔪᐊᑦ ᒪᓂᒪᑎᑦᓯᖃᑦᑕᕐᒥᔪᑦ ᐃᓕᓐᓂᐊᒐᒃᓴᐅᔪᓂᒃ ᐅᖓᓯᑦᑐᒃᑯᑦ ᖃᕆᓴᐅᔭᒃᑯᑦ ᐃᓕᓐᓂᐊᒐᑦᓴᓂᒃ. ᑕᒪᓐᓇ ᐊᑐᖅᑕᐅᖃᑦᑕᕈᓐᓇᓲᖑᒻᒥᔪᖅ ᐊᓐᖑᑎᑎᑦᓯᒋᐊᕈᒪᔪᓄᑦ ᐊᔪᓐᖏᓂᕐᒥᓂᒃ ᐅᕝᕙᓘᓐᓃᑦ ᓇᖕᒥᓂᖅ ᐱᔪᒪᓂᕐᒥᒍᑦ.
ᓱᕈᓯᓛᓄᑦ ᐃᓕᓐᓂᐊᕐᕖᑦ ᐊᒻᒪᓗ ᐃᓕᓐᓂᐊᕐᕕᐊᓗᓐᓂ ᐃᓕᓐᓂᐊᒐᒃᓴᖃᐅᕐᒥᔪᖅ ᓄᓇᓕᓕᒫᓂ. ᐃᓕᓐᓂᐊᕐᕖᑦ ᐊᐅᓚᑕᐅᓪᓗᑎᒃ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᖏᓐᓄᑦ. ᖃᐅᔨᒋᐊᕐᕕᒃᓴᐅᔪᓐᓇᖅᑐᑦ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᓄᓇᑦᓯᓐᓄᑦ ᐅᖄᓚᐅᑎᓯᐅᑎᖏᓐᓂ ᒐᕙᒪᒃᑯᑦ ᑐᖑᔪᖅᑐᖁᑎᖏᓐᓂ “ᐃᓕᓐᓂᐊᕐᓂᓕᕆᓂᕐᒨᖓᔪᓂ”.
ᐅᐃᕖᑎᑐᑦ ᐃᓕᓐᓂᐊᕐᕕᖏᑦ (ᓱᕈᓯᓛᓄᑦ ᐊᒻᒪᓗ ᐃᓕᓐᓂᐊᕐᕕᐊᓗᓕᐊᓵᖅᑐᓄᑦ) ᐃᖃᓗᓐᓃᓐᓇᖅ ᐱᑕᓕᒃ.
ᐅᖃᓕᒫᒐᖃᕐᕖᑦ
ᐅᖃᓕᒫᒐᖃᕐᕕᒃᑕᖃᐅᕐᒥᔪᖅ ᓄᓇᓕᓐᓂ ᐊᖅᑯᑕᐅᓪᓗᑎᒃ ᒐᕙᒪᒃᑯᑎᒍᑦ ᐅᖃᓕᒫᒐᖃᕐᕕᒋᔭᐅᔪᑦ ᐅᕝᕙᓘᓐᓃᑦ ᐊᑐᖅᑐᐊᕈᓐᓇᕕᒃᓴᐅᓪᓗᓂ ᐅᖃᓕᒫᒐᕐᓂᒃ ᐊᑭᖃᓐᖏᑦᑐᓂᒃ ᓄᓇᕗᒻᒥ ᐅᖃᓕᒫᒐᖃᕐᕕᓕᕆᔨᖏᓐᓂᒃ. ᓄᓇᓯ ᐅᖃᓕᒫᒐᖃᕐᕕᖃᓐᖏᑉᐸᑦ, ᐊᑐᕈᓐᓇᓯᐊᖅᑐᑎᑦ ᐊᑐᖅᑐᐊᕕᖕᒥᒃ ᑎᑎᖅᑲᓂᐊᕐᕕᒃᑯᑦ. ᑐᑭᓯᒋᐊᒃᑲᓂᕐᕕᒃᓴᖅ ᑕᒪᑦᓱᒥᖓ ᐱᔨᑦᓯᕋᐅᑎᒥᒃ, ᐅᖄᓚᓗᑎᑦ 1-867-793-3351, ᖃᐅᔨᒋᐊᕐᓗᑎᓪᓘᓐᓃᑦ ᐃᑭᐊᖅᑭᔾᔪᑎᑦᑎᓐᓂᒃ: www.publiclibraries.nu.ca ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᐅᕗᖓ:
Borrower by Mail Program
Nunavut Public Library Services
P.O. Box 270
Baker Lake, Nunavut
X0C 0A0
ᐱᓐᖑᐊᖅᑐᓕᕆᓂᖅ
ᐋᖅᑭᑦᑕᐅᓯᒪᒐᔪᑦᑐᑦ ᓇᓪᓕᐅᓂᖅᓯᐅᕐᓃᑦ ᓄᓇᓕᓕᒫᓂ. ᖃᐅᔨᒋᐊᕐᓗᒋᑦ ᓄᓇᑦᓯᓐᓂ ᑐᓴᕈᑎᖃᐅᑏᑦ ᐅᕝᕙᓘᓐᓃᑦ ᕼᐊᒻᓚᑦᑯᑦ ᐱᓐᖑᐊᖅᑐᓕᕆᔨᖏᓐᓄᑦ ᐊᐅᓚᓂᕆᔭᐅᓂᐊᖅᑐᓂᒃ ᓄᓇᑦᓯᓐᓂ ᐱᓐᖑᐊᖅᑐᓕᕆᓂᕐᒧᑦ. ᑲᑐᔾᔨᖃᑎᒌᑦᑐᓄᑦ ᐊᐅᓚᑦᓯᔪᒪᔪᓄᑦ ᐋᖅᑭᑦᓱᖅᑕᐅᒐᔪᓲᖑᔪᑦ ᐱᔪᒪᓂᖏᑦ ᐃᓄᖏᑕ ᒪᓕᒃᑕᐅᓪᓗᑎᒃ. ᐊᐱᖅᓱᕆᑦ.
ᑮᓇᐅᔭᒃᑯᕕᒃ
ᑮᓇᐅᔭᒃᑯᕕᓕᕆᓂᕐᒧᑦ ᐱᔨᑦᓯᕈᑏᑦ ᓄᓇᕗᒻᒥ ᐱᑕᖃᓗᐊᕌᓗᓐᖏᑦᑐᑦ. ᑮᓇᐅᔭᒃᑯᕕᑦ ᑖᒃᑯᓇᓃᑦᑐᑦ ᓄᓇᓕᓐᓂ:
ᐃᖃᓗᑦᑑᑦᑎᐊᖅ – ᕈᐃᔪᓪ ᕙᐃᓐᒃ
ᐃᖃᓗᐃᑦ – CIBC, ᕈᐃᔪᓪ ᕙᐃᓐᒃ
ᑲᖏᕐᖠᓂᖅ – CIBC, ᕈᐃᔪᓪ ᕙᐃᓐᒃ
ᐊᓯᓕᒫᖏᓐᓂ ᓄᓇᓕᓐᓂ, ᓂᐅᕕᖅᑎᒃᑯᑦ ᐊᒻᒪᓗ ᑯᐊᐸᒃᑯᑦ ᓂᐅᕕᕐᕕᖏᑦ ᐊᑐᐃᓐᓇᐅᒪᑎᑦᓯᓲᖑᒻᒥᔪᑦ ᑮᓇᐅᔭᒃᑯᕕᑦᑐᑦ ᐱᔨᑦᓯᕋᐅᑎᓂᒃ. ᑐᑭᓯᒋᐊᒃᑲᓂᕐᕕᒃᓴᐅᔪᖅ ᐅᑭᐅᖅᑕᖅᑐᒥ ᑮᓇᐅᔭᓕᕆᓂᕐᒨᖓᔪᓂᒃ, ᑕᕝᕗᖓ ᑕᑯᒋᐊᕐᓗᑎᑦ ᐃᑭᐊᖅᑭᔾᔪᑎᖓᓄᑦ www.northwest.ca. ᑐᓴᐅᒪᑎᑦᓯᔾᔪᑏᑦ ᑯᐊᐸᒃᑯᓐᓂ ᑮᓇᐅᔭᒃᑯᕕᒃᑎᑐᑦ ᐱᔨᑦᓯᕋᐅᑎᓂᒃ ᐅᕙᓐᖓᑦ www.arcticco-op.com. ᓇᓂᑐᐃᓐᓇᖅ ᓄᓇᖃᕋᓗᐊᕈᕕᑦ ᐊᑐᕈᓐᓇᓯᐊᖅᑐᑎᑦ ᖃᕆᓴᐅᔭᒃᑯᑦ ᑮᓇᐅᔭᓕᕆᔾᔪᑎᓂᒃ ᐊᑭᓕᖅᓱᐃᓂᕐᒥᒃ ᐊᑭᓕᒐᒃᓴᓂᒃ ᐊᒻᒪᓗ ᓄᒃᑎᕆᓂᕐᒥᒃ ᑮᓇᐅᔭᓂᒃ ᑮᓇᐅᔭᒃᑯᕕᒋᔭᕐᓂ.
ᓄᒃᑎᕆᐊᓚᐅᓐᖏᓂᕐᓂ, ᐅᖃᖃᑎᖃᕈᒪᓇᔭᖅᑐᒃᓴᐅᔪᑎᑦ ᐊᖏᔪᖅᑳᕆᔭᕐᓂᒃ ᖃᐅᔨᒋᐊᕐᕕᒃᓴᐅᔪᒥᒃ ᖃᐅᔨᓇᓱᐊᕐᓗᑎᑦ ᑭᓱᓂᒃ ᐱᔨᑦᓯᕋᐅᑎᖃᕐᒪᖔᑕ ᐊᑐᐃᓐᓇᐅᔪᓂᒃ ᓄᓇᑦᓯᓐᓂ.
ᑮᓇᐅᔭᑐᐃᓐᓇᐃᑦ ᐊᒻᒪᓗ ᐊᐅᒃᑕᔫᑦ ᐊᑭᓕᒃᓴᖃᐅᑏᑦ ᐊᑐᖅᑕᐅᒐᔪᓐᓂᖅᐹᑦ ᐊᑭᓕᖅᓱᐃᒍᑕᐅᓪᓗᑎᒃ. ᑮᓇᐅᔭᓂᒃ ᐲᖅᓯᕖᑦ ATM ᐊᑐᐃᓐᓇᐅᖃᑦᑕᓲᖑᒻᒥᔪᑦ ᓄᓇᓕᓕᒫᑲᓴᖕᓂ.
