ᐊᐅᔭᖅ ᖁᕕᐊᓇᕆᐊᖃᕐᒪᑦ - ᐱᓗᐊᖅᑐᒥ ᓄᑕᖅᑲᓄᑦ, ᒫᓘ ᑲᐴᓚᒃ, ᓛᓐᔅ ᐋᑯᓗᒃ, ᕗᓃᔅ ᑲᐴᓚᒃ, ᕼᐊᐃᓐᓇᓕ ᕼᐊᓂᓕᐊᖅ, ᐅᕼᐅᒻᒥᒃ ᐋᑯᓗᒃ.

ᐊᕐᕕᐊᓂ ᐋᓐᓂᐊᕐᕕᖓ ᖃᐅᒻᒪᖅᑭᔮᖅᓯᔪᖅ ᐅᑭᐅᒃᑯᑦ ᐅᓐᓄᐊᑯᑖᕌᓘᑎᓪᓗᒍ.

ᓄᓇᕗᑦ 101

ᓄᓇᕗᑦ (“ᓄᓇᕗᑦ” ᐃᓄᐃᑦ ᐅᖃᐅᓯᖓᒍᑦ) ᑲᓇᑕᒥ ᐱᖓᔪᒋᓕᐅᑎᓚᐅᖅᑐᖅ ᓄᑖᖑᓂᖅᐸᐅᓪᓗᓂ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᖏᓐᓂ ᐄᑉᕈ 1, 1999-ᒥ. ᓄᓇᒋᔭᕗᑦ ᓯᕕᑐᑎᒋᔪᖅ 2 ᒥᓕᔭᓐ ᑭᓛᒥᑕᓂᒃ ᐊᒻᒪᓗ ᑕᓪᓕᒪᐃᖅᓱᖅᑐᓂ ᑲᓇᑕᐅᑉ ᓄᓇᖓᓂᒃ ᐊᖏᑎᒋᓂᓕᒃ. ᐊᖏᔪᖅᑳᖃᕐᕕᖓ, ᐃᖃᓗᐃᑦ (ᑕᐃᒎᓯᖃᖃᑦᑕᓚᐅᖅᓯᒪᔪᖅ ᕗᕉᕕᓴ ᐸᐃ), ᓂᒋᐊᑕ ᑲᓇᓐᓇᖅᐸᓯᐊᓂ ᕿᑭᖅᑖᓘᑉ ᐃᓱᐊᓂ ᐊᒻᒪᓗ 7,000-ᓂᒃ ᐃᓄᖃᖅᑐᓂ.

25 ᓄᓇᓕᖏᑦ ᓄᓇᕗᑦ, ᑕᒫᓃᑦᑐᖅ ᐱᖓᓱᓂ ᐊᕕᑦᑐᖅᓯᒪᓂᐅᔪᓂ ᖃᐅᔨᓴᐅᑎᖏᑦ ᐱᖓᓲᓕᖅᑲᖓᓪᓗᑎᒃ. ᓄᓇᕗᑦ ᐱᖓᓲᓕᖅᑲᖓᔪᖅ ᐊᕕᑦᑐᖅᓯᒪᓂᖓ: ᕿᑭᖅᑖᓗᒃ, 13 ᓄᓇᓕᖏᑦ; ᑭᕙᓪᓕᖅ, 7 ᓄᓇᓕᖏᑦ; ᐊᒻᒪᓗ ᕿᑎᕐᒥᐅᑦ, ᑕᓪᓕᒪᑦ ᓄᓇᓕᖏᑦ. ᐃᓄᖃᓚᐅᖅᑐᖅ 31,113 ᔪᓚᐃ 1, 2007-ᒥ.

53%-ᒦᑦᑐᑦ ᐃᓄᖏᑦ ᐅᑭᐅᓖᑦ 25 ᒥᑦᓯᑎᓐᓂ. ᓄᓇᕗᑦ ᐱᖓᓱᓂᒃ ᐃᓕᓴᕆᔭᐅᓯᒪᔪᓂᒃ ᐅᖃᐅᓯᓕᒃ - ᐃᓄᐃᑦ ᐅᖃᐅᓯᖓ, ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ. ᐃᓄᓪᓚᑦᑖᑦ 85%-ᓃᑦᑐᑦ ᓄᓇᕗᒻᒥᐅᓕᒫᑦ ᑲᑎᓪᓗᒋᑦ. ᒥᑭᔫᓪᓗᓂ ᐅᐃᕖᑎᑐᑦ-ᐅᖃᕈᓐᓇᖅᑐᑦ ᐃᓄᖏ 5%-ᖏᓐᓃᑦᑐᑦ ᕿᑭᖅᑖᓗᒻᒥ ᓄᓇᖃᖅᑐᑎᒃ, ᐱᓗᐊᖅᑐᒥ ᐃᖃᓗᐃᑦ ᓄᓇᓕᐸᐅᔭᖏᓐᓂᒃ.

ᓄᓇᕗᑦ ᒪᒃᑯᓂᖅᐹᖑᒻᒥᔪᑦ ᐃᓄᖏᑦ ᑲᓇᑕᒥ ᑕᒫᓂᒐᓚᒃ ᐅᑭᐅᖏᑦ 22-ᓃᑦᑐᑦ ᓈᓴᖅᑕᐅᓯᒪᓂᖏᑎᒍᑦ.

ᓄᓇᕗᑦ ᐃᒃᑮᓇᐃᓐᓇᕈᔪᓲᖑᔪᖅ ᐊᕐᕌᒍᓕᒫᒥ. ᐊᐳᑎᖃᕈᓐᓇᓯᐊᖅᑐᑎᒃ, ᐊᓪᓛᑦ ᐊᐅᔭᐅᒐᓗᐊᖅᐸᑦ. ᐃᖃᓗᓐᓂ, 320 ᑭᓛᒥᑕᑦ ᒥᑦᓯᑎᓐᓂ ᐅᖓᓯᑦᑎᒋᔪᖅ ᐅᑭᐅᖅᑕᖅᑑᑉ ᑎᑎᕐᓂᖓᓂᒃ, ᐊᐅᔭᒃᑯᑦ ᐅᖅᑰᓂᖅᐹᖑᓲᖑᔪᖅ 11C ᐅᑭᐅᒃᑯᑦ ᖁᑦᓯᓂᖅᐹᖑᓲᖑᓪᓗᓂ ᑎᑭᐅᑎᓯᒪᓲᖑᔪᖅ -26C to -33C. ᐅᑭᐅᒃᑯᑦ ᐅᓐᓄᐊᒃᑯᑦ ᕿᓚᒃ ᖃᐅᒻᒪᖅᑕᐅᓯᒪᓲᖑᔪᖅ ᐊᖅᓴᕐᓂᕐᒧᑦ ᒧᒥᖅᑐᓄᑦ, ᐊᖅᓴᕐᓃᑦ ᑕᐃᔭᐅᓲᖑᒻᒥᔪᑦ ᖃᓪᓗᓈᑎᑐᑦ ᐊᕉᕋ ᕗᕆᐋᓕᔅ. ᓄᓇᕗᑦ ᐊᖏᕐᕋᕆᔭᐅᒻᒥᔪᖅ ᐊᔾᔨᒌᓐᖏᑦᑐᓄᑦ ᓂᕐᔪᑎᓄᑦ: ᐅᒥᖕᒪᒃ ᐊᒻᒪᓗ ᑐᒃᑐᐃᑦ ᑲᑎᕆᓃᑦ ᐃᓗᐃᓕᕐᒥ ᓄᓇᖓᓂ ᑕᑯᔭᒃᓴᐅᓲᑦ ᓇᑎᕐᓇᕐᓂ ᐊᒡᖤᐃᓪᓗᑦᑕᐅᖅ ᑕᒫᓃᖃᑕᐅᓪᓗᑎᒃ ᐊᒻᒪᓗ ᒥᑭᔫᑕᐅᓂᖅᓴᑦ ᐆᒪᔪᑦ. ᑕᕆᐅᑉ ᓯᓈᓂ ᓇᓄᐃᑦ ᐱᔪᒃᑎᐅᕗᑦ ᑕᒪᒃᑯᑎᒎᓇ ᐳᒃᑖᑎᒍᑦ ᓂᕿᑦᓴᓯᐅᖅᑐᑦ ᓇᑦᓯᕐᓂᒃ ᐊᒻᒪᓗ ᐊᐃᕕᕐᓂᒃ. ᕿᓚᓗᒐᐃᑦ ᑕᕆᐅᖓᓃᑦᑐᑦ ᓂᓪᓕᓇᖅᑐᒻᒪᕆᐅᔪᒥ ᐊᒻᒪᓗ ᐅᓄᖅᑐᑦ ᐊᔾᔨᒌᓐᖏᑦᑐᑦ ᑎᖕᒥᐊᑦ ᐅᑎᖅᑕᖅᑐᑦ ᐅᑭᐅᖅᑕᖅᑐᒧᑦ ᐊᐅᔭᒃᑯᑦ.

ᓄᓇᓕᓐᓂ ᐱᔨᑦᓯᕋᐅᑏᑦ

ᓄᓇᕗᒻᒥ ᓄᓇᓕᓕᒫᑲᓴᖏᑦ ᐅᖓᓯᒋᐅᑦᑐᑦ ᓄᓇᖓᒍᑦ ᐊᒻᒪᓗ ᖃᖓᑕᓲᒃᑯᑦ ᑭᓯᐊᓂ ᑎᑭᑕᒃᓴᐅᓪᓗᑎᒃ ᖃᖓᑕᓲᒃᑯᑦ ᐊᒻᒪᓗ ᑕᕆᐅᒃᑯᑦ. ᓄᓇᓕᒃ ᖃᖓᑕᓲᒃᑯᑦ ᐱᔨᑦᓯᕐᕕᓖᑦ, ᐊᑭᑐᔪᐊᓘᒐᓗᐊᖅᑎᓪᓗᒍ ᖃᖓᑦᑕᐅᑦ. ᐃᖏᕐᕋᑲᑕᖃᑦᑕᕐᓂᖅ ᐊᐅᓪᓚᕐᓗᓂ ᐅᑎᕐᓗᓂᓘᓐᓃᑦ ᓄᓇᕗᒻᒥ ᐅᓄᖅᑐᐃᓱᕐᓗᓂ ᑭᓯᐊᓂ ᖃᖓᑕᔭᕋᓗᐊᕐᓗᓂ ᐊᔾᔨᒌᓐᖏᑐᖅᑎᒍᑦ, ᓯᓂᒃᑕᖃᑦᑕᕆᐊᖃᕐᓂᕐᓗ ᐃᖕᒥᓚᐅᓐᖏᓪᓗᓂ ᐊᑐᖅᑕᐅᒐᔪᑦᑐᖅ.

ᓂᐅᕕᖅᑎᒃᑯᓐᓂᒃ ᓄᐊᑕᓐ ᓂᐅᕕᕐᕕᖏᓐᓂᒃ ᐊᒻᒪᓗ ᓄᓇᓕᓐᓂ ᑯᐊᐸᖃᐅᖅᑐᑦ ᓄᓇᓕᓕᒫᓂ. ᓂᖀᑦ, ᐃᓪᓗᓯᐅᑏᑦ ᐊᒻᒪᓗ ᐃᖕᒥᒧᑦ ᐊᑐᖅᑕᐅᖃᑦᑕᕆᐊᓖᑦ ᓂᐅᕕᐊᒃᓴᑦ ᐊᑭᑐᓂᖅᓴᐅᔪᑦ “ᖃᓪᓗᓈᓂ” ᓂᐅᕕᐊᒃᓴᖏᓐᓂᒃ. ᖃᕆᓴᐅᔭᒃᑯᑦ ᐃᑭᐊᖅᑭᔾᔪᑏᑦ, ᐊᑐᐃᓐᓇᐅᑎᑕᐅᔪᑦ ᓄᓇᓕᓕᒫᓂ, ᐃᑲᔫᑎᖃᖃᑦᑕᖅᑐᖅ ᐅᖓᓯᑦᑐᐊᓗᒻᒦᓂᕐᒥᒃ ᑲᖔᑐᐃᓐᓇᕇᒃᑯᑕᐅᓪᓗᓂ ᐊᒻᒪᓗ ᑭᓱᑐᐃᓐᓇᑦᓯᐊᓂᒃ ᓂᐅᕕᐊᒃᓴᐅᔪᓂᒃ ᓇᑭᑐᐃᓐᓈᖅᓯᒪᔪᓂᒃ ᓯᓚᕐᔪᐊᒥᒃ ᓂᐅᕕᖅᐸᑦᑐᓄᑦ.

ᐊᓯᐊᒎᕐᕕᒃᓴᖃᕐᒥᔪᖅ ᓄᓇᓖᑦ ᓂᐅᕕᕐᕕᖏᑕ ᐊᓯᖏᓐᓂᒃ. ᐊᑐᖅᑕᐅᓲᖑᒻᒥᔪᑦ ᖃᖓᑕᓲᒃᑯᑦ ᐊᒻᒪᓗ ᐅᒥᐊᕐᔪᐊᒃᑯᑦ ᑎᑭᓴᐃᖃᑦᑕᕐᓂᒃ ᐊᑐᖅᑕᒻᒪᕆᐊᓘᕙᑦᑐᖅ ᐅᓄᖅᑐᓄᑦ ᐃᓄᖏᓐᓄᑦ. ᖃᖓᑕᓲᒃᑯᑦ ᓂᕿᑖᖃᑦᑕᕐᓂᖅ ᑖᓐᓇ ᐊᑐᐃᓐᓇᐅᔪᖅ ᐊᒻᒪᓗ ᓱᕋᒍᓐᓇᖅᑐᓂᒃ ᐊᒻᒪᓗ ᐃᓚᖏᓐᓂᒃ ᓱᕋᒍᓐᓇᖏᑦᑐᓂᒃ ᓂᕿᑖᖃᑦᑕᓲᖑᔪᑦ ᐊᑭᑭᓪᓕᒋᐊᖅᓯᒪᑎᓪᓗᒋᑦ ᐅᓯᔭᐅᔾᔪᑎᖏᑦ ᐊᖏᔫᑕᐅᓂᖅᓴᓂᒃ ᓄᓇᓂᒃ ᓲᕐᓗ ᐅᐃᓂᐱᒡ, ᐋᑑᕚ ᐅᕝᕙᓘᓐᓃᑦ ᔭᓗᓇᐃᕝᒥᒃ. ᑕᒪᕐᒥᒃ ᓂᕿᓂᒃ ᑎᑭᓴᐃᒍᑏᑦ ᐊᑭᓕᖅᓯᒪᔭᕆᐊᖃᓲᑦ. ᐅᒥᐊᕐᔪᐊᒃᑯᑦ, ᐅᕝᕙᓘᓐᓃᑦ ᓯᑲᐅᒃᑯᑦ ᑎᑭᓵᖑᔪᓐᓇᖅᑎᑕᐅᓲᑦ ᖃᑦᑕᔪᓐᓃᑦᑐᓂᒃ, ᐸᓂᖅᑐᓂᒃ ᐊᒻᒪᓗ ᖁᐊᕐᓂᖅ ᓂᕿᓂᒃ ᐅᓯᔭᐅᓲᖑᔪᑦ ᓄᓇᓕᓐᓄᑦ ᐊᐅᔭᒃᑯᑦ.

ᖃᕆᓴᐅᔭᒃᑯᑦ ᐃᑭᐊᖅᑭᔾᔪᑎᒃᑯᑦ ᑮᓇᐅᔭᓕᕆᓐᓇᐅᒻᒥᔪᖅ ᓄᓇᕗᑦ ᓄᓇᓕᓕᒫᖏᓐᓂ. ᑮᓇᐅᔭᒃᑯᕕᖕᒪᕆᐅᔪᑦ ᑮᓇᐅᔭᒃᑯᕕᖃᐅᖅᑐᑦ ᐃᖃᓗᑦᑑᑎᐊᕐᒥ (ᕈᐃᔪᓪ ᕙᐃᓐᒃ), ᐃᖃᓗᓐᓂ (CIBC ᐊᒻᒪᓗ ᕈᐃᔪᓪ ᕙᐃᓐᒃ) ᐊᒻᒪᓗ ᑲᖏᕐᖠᓂᕐᒥ (CIBC ᐊᒻᒪᓗ ᕈᐃᔪᓪ ᕙᐃᓐᒃ). ᓄᓇᓕᓕᒫᑲᓴᑦ ᑮᓇᐅᔭᓂᒃ ᐲᖅᓯᕕᖃᐅᖅᑐᑦ ATM ᓂᐅᕕᖅᑎᒃᑯᖏᓐᓂ ᐊᒻᒪᓗ/ᐅᕝᕙᓘᓐᓃᑦ ᑯᐊᐸᒃᑯᖏᓐᓂ. ᐊᐅᒃᑕᔫᑦ ᐊᑭᓕᒃᓴᖃᐅᑏᑦ ᐊᑐᖅᑕᐅᔪᓐᓇᓲᑦ ᐅᓄᖅᑐᓂ ᓂᐅᕕᕐᕕᖕᓂ, ᑭᓯᐊᓂ ᐃᓘᓐᓇᖏᓐᓂᐅᖏᑦᑐᖅ, ᓂᐅᕕᕐᕕᖕᓂ ᐱᔨᑦᓯᕋᕐᕕᖕᓂᓗ.

ᐸᓖᓯᒃᑯᑦ (RCMP) ᐸᓖᓯᒋᔭᐅᔪᑦ ᓄᓇᓕᓕᒫᓂ ᓄᓇᕗᒻᒥ. ᐅᓄᖅᑐᑦ ᓄᓇᓖᑦ ᐃᖅᑲᓇᐃᔭᖅᑎᑦᓯᕙᑦᑐᑦ ᓄᓇᓕᓐᓃᖔᖅᑐᓂᒃ ᐸᓖᓯᓐᖑᐊᒥᒃ (ᓂᒃ) ᓄᓇᓖᑦ ᒪᓕᒐᕋᓛᖏᓐᓄᑦ ᐸᓖᓯᓐᖑᐊᖑᓪᓗᑎᒃ.

ᓱᕈᓯᓛᓄᑦ ᐊᒻᒪᓗ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕐᕕᖃᐅᖅᑐᑦ ᓄᓇᓕᓐᓂ ᐊᑐᓂᑦ. ᐅᐃᕖᑎᑐᑦ ᐃᓕᓐᓂᐊᕐᕕᒃᑕᖃᕐᒥᔪᖅ (ᓱᕈᓯᓛᓄᑦ ᐊᒻᒪᓗ ᐃᓕᓐᓂᐊᕐᕕᐊᓗᒻᒨᕋᑖᓄᑦ) ᐃᖃᓗᓐᓂ.

ᓯᓚ

ᓄᓇᕗᑦ ᐊᖏᔪᕐᔪᐊᒻᒪᕆᐊᓘᒻᒪᑦ ᐊᒻᒪᓗ ᓯᓚᖓ ᐊᔾᔨᒌᓐᖏᒍᓐᓇᓯᐊᖅᑐᖅ. ᑕᒪᓐᓇᐅᑎᓪᓗᒍ, ᑲᖏᕙᓯᓐᓂᖅᓴᓂ ᓄᓇᓂ ᐅᖅᑰᓂᖅᓴᐅᔪᖅ ᔪᓚᐃᒥ ᐊᒻᒪᓗ ᐊᐅᒡᒍᓯᒥ ᓯᔾᔭᕐᒥᐅᑕᕐᓂᒃ ᐊᒻᒪᓗ ᐅᐊᓕᓂᖅᐸᓯᒻᒥᐅᑕᑦ ᐅᖅᑰᓂᖅᓴᐅᒻᒥᔪᖅ ᕿᑭᖅᑖᓗᒻᒥᒃ.

ᐅᐱᕐᖔᒃᑯᑦ ᐅᖅᑰᓂᖓ ᐊᔾᔨᒌᐸᓗᓲᖑᒻᒥᔪᖅ ᓄᓇᕗᒻᒥ ᐅᓪᓗᒃᑯᑦ ᐅᖅᑰᓂᕆᒐᔪᑦᑕᖓ ᐊᑯᓐᓂᖓᓂ –20C ᐊᒻᒪᓗ –10C. ᓂᓪᓚᓱᒐᔭᕋᓗᐊᖅᑎᓪᓗᒍ ᐊᑭᒻᒥᔮᖅᑕᐅᓂᑯᒧᑦ ᓯᕿᓂᕐᒧᑦ ᐅᖅᑰᓯᑎᑕᐅᓯᒪᓲᖅ. ᒫᑦᓯᐅᑉ ᓄᓐᖑᐸᓗᐊᓂ ᒪᐃ ᓄᓐᖑᐸᓗᐊᓄᑦ ᓯᕿᓂᐅᑉ ᐊᑭᒻᒥᔮᕐᓂᖓ ᐊᐳᒻᒧᑦ ᐊᒻᒪᓗ ᓯᑯᒧᑦ ᓴᓐᖏᔪᒻᒪᕆᐅᓂᖓᓄᑦ “ᓯᕿᓐᓂᑐᖅᓯᐅᓯᔭᐃᓐᓇᕆᐊᖃᕈᑎᒋᕚ”.

ᐊᑐᐃᓐᓇᐅᒪᔭᕆᐊᖃᕐᒥᔪᑎᑦ ᐅᓪᓗᑭᓐᓂᖅᓴᐅᔪᓄᑦ ᐊᒻᒪᓗ ᐃᔾᔨᖃᕐᓂᖅᓴᐅᔪᒧᑦ ᐅᑭᐅᒃᑯᑦ. ᐅᐊᖕᓇᒧᑦ ᐃᖏᕐᕋᕙᓪᓕᐊᒍᕕᑦ, ᐅᓪᓗᑭᓐᓂᖅᓴᕈᖅᐸᓪᓕᐊᓲᖑᔪᖅ. ᓄᓇᓖᑦ ᐅᑭᐅᖅᑕᖅᑑᑉ ᑎᑎᕐᓂᐊᑕ ᐅᐊᖕᓈᓃᑦᑐᑦ ᓯᕿᓂᕐᒥᒃ ᑕᑯᖃᑦᑕᕈᓐᓃᓲᖑᔪᑦ ᐊᑯᓂᐊᓗᒃ. ᑭᐳᓯᒪᒻᒥᔪᖅ, ᐊᐅᔭᒃᑯᑦ ᐅᐊᖕᓇᕐᒧᐊᖅᐸᓪᓕᐊᒍᕕᑦ 24-ᓂᒃ ᐃᑲᕐᕋᓂᒃ ᓯᕿᓐᓃᓇᕐᓂᐊᖅᑐᖅ ᑲᐃᕙᑐᐃᓐᓇᕐᓗᓂ ᓯᕿᓂᖅ.

ᖃᐅᓯᕐᓇᓗᐊᓐᖏᓐᓂᖓᓄᑦ ᐃᒃᑮᓇᕐᓂᖓᑕ ᐃᑉᐱᓇᕐᓂᖓ, –20C ᐃᒃᑮᓇᕐᓂᖃᕋᓗᐊᖅᐸᑦ ᐅᓪᓗᒃᑯᑦ ᓲᕐᓗ –5C ᖃᓪᓗᓈᑦ ᓄᓇᖓᓂ ᓯᓚᖓ ᑲᓇᑕᒥ. ᔭᓐᓄᐊᓕᒥᒃ ᒫᑦᓯᒧᑦ ᐃᔾᔨᖃᕐᓂᖅᐸᐅᖃᑦᑕᓲᖑᔪᑦ ᑕᖅᑮᑦ. ᐃᔾᔨᖓᓄᑦ

ᐅᔾᔨᓇᕐᓂᖅᐸᐅᖃᑦᑕᓲᖑᔪᖅ ᓯᓚᖓᑕ ᓯᓚᓯᐅᑎᒃᑯᑦ ᐃᒃᑮᓇᕐᓂᕋᓗᐊᖓᓂᒃ.

ᐅᑭᐅᖅᑕᖅᑐᓕᒫᑲᓴᒃ ᓇᓗᓇᐃᖅᑕᐅᓯᒪᔪᖅ ᓇᓄᖃᐅᑕᐅᔪᖅ ᐱᕈᖅᑐᒻᒪᕆᖃᓐᖏᑦᑐᖅ ᐅᖃᐅᓯᐅᓲᖑᔪᖅ ᐸᓂᕐᓂᖓᓄᑦ. ᐅᓪᓗᑯᑖᕌᓘᓲᖑᔪᑦ ᐸᓂᖅᑐᑦ, ᓄᕗᔭᖃᓐᖏᓯᐊᖅᑐᑦ ᐅᓪᓗᕋᓵᓗᐃᑦ ᐊᐃᓪᓕᖓᓐᖏᑦᓯᐊᖅᑐᑦ. ᐅᑭᐅᖅᑕᖅᑐᒥᐅᑕᑦ ᓄᓇᓖᑦ ᐊᐱᓐᖏᓂᖅᓴᐅᓲᖑᔪᑦ ᐊᖏᔫᑕᐅᓂᖅᓴᓂ ᓄᓇᓕᐸᐅᔭᕐᓂᒃ ᖃᓪᓗᓈᓂ.

ᐃᓘᓐᓇᓂᒐᓚᒃ ᓄᓇᒋᔭᑦᑎᓐᓂ, ᐅᐱᕐᖔᒃᑯᑦ ᓂᓪᓚᓱᖃᑦᑕᓲᖑᓂᖓᓄᑦ ᑐᑭᖃᖅᑐᖅ ᐊᐳᑦ ᐊᐅᓐᓇᓵᓲᖑᔪᖅ ᔫᓂ ᑎᑭᕋᑕᖅᑐᒍ. ᓄᓇᕗᓕᒫᑲᓴᒃ, ᑕᖅᑭᓂ ᐊᐳᑎᖃᓲᖑᓐᖏᑦᑐᑐᐊᑦ ᓄᓐᖑᐊᓂ ᔫᓂ, ᔪᓚᐃ ᐊᒻᒪᓗ ᐊᐅᒡᒍᓯᒥ. ᑐᕙᐃᔭᓲᖑᔪᖅ ᑭᖑᓂᐊᓂ. ᒪᖁᖃᑦᑕᕋᔪᑦᑐᖅ ᑐᕙᐃᔭᓚᐅᖅᑎᓪᓗᒍ, ᔪᓚᐃ ᑕᖅᑭᖓᑕ ᕿᑎᐸᓗᐊᓂ ᐊᒻᒪᓗ ᐊᐅᒡᒍᓯᐅᑉ ᓄᓐᖑᐊᓂ.

ᐱᖅᓯᕋᔪᑦᑐᖅ ᐆᑦᑑᕝᕙᒥ ᓅᕙᐃᒻᕙᒥᓗ ᐊᒻᒪᓗ ᕕᑉᕗᐊᓕᒥᒃ ᐄᑉᕈᒧᑦ.

ᐃᓘᓐᓇᑲᓴᑎᒃ ᓄᓇᓖᑦ 24-ᓂᒃ ᐃᑲᕐᕋᓂ ᖃᐅᒪᖃᑦᑕᓕᓲᖑᔪᑦ ᒪᐃᒥᒃ ᐊᐅᒡᒍᓯᒧᑦ, ᐊᒻᒪᓗ 24-ᓂᒃ ᐃᑲᕐᕋᓂᒃ ᑖᖃᑦᑕᓯᓲᖑᔪᖅ ᓅᕙᐃᒻᕙᒥᒃ ᕕᑉᕗᐊᓕᒧᑦ. ᐅᐱᕐᖔᑐᖃᐅᓕᖅᑎᓪᓗᒍ ᐊᒻᒪᓗ ᐊᐅᔭᒃᑯᑦ ᑕᖅᑭᖏᓐᓂ, ᖃᐅᒪᐃᓐᓇᓯᓲᖑᓂᖓᓄᑦ ᓱᕐᕋᐃᓯᒪᓲᖑᕗᖅ ᐃᓄᖏᑕ ᓯᓂᖃᑦᑕᕐᓂᖏᓐᓂᒃ. ᐅᓄᖅᑐᑦ ᑕᓗᑦᓯᖅᓯᒪᖃᑦᑕᓲᖑᔪᑦ ᐃᓪᓗᕈᓯᖏᑕ ᐃᒐᓛᖏᓐᓂᒃ ᐅᕝᕙᓘᓐᓃᑦ ᓯᓂᖃᑦᑕᓲᖑᔪᑦ ᒥᓕᒐᖅᓯᒪᓪᓗᑎᒃ. ᑭᐳᑦᓯᒪᒻᒥᔪᖅᑕᐅᖅ, ᐅᑭᐅᒃᑯᑦ ᐃᓚᖏᑦ ᓱᕐᕋᑦᑕᐅᓯᒪᓲᖑᒻᒥᔪᑦ ᑖᖏᓐᓇᕐᓂᖓᓄᑦ. ᖃᐅᒻᒪᖅᑯᑏᑦ ᐃᓅᓯᕐᒧᑦ ᐃᑲᔪᕐᓂᖃᓲᖑᔪᑦ ᑕᐃᒪᐃᓕᕋᐃᒻᒪᑦ.