ᓱᕐᕋᐃᑦᑐᖅ ᐅᑕᖅᑭᔪᖅ. ᖁᑦᓯᓂᖅᐸᐅᔪᑦ ᑲᓇᑕᐅᑉ ᐊᒡᒍᐊᓗᐊ, ᐱᐊᓂᐅᑉ ᐊᒋᐅᑉᐱᓂᐊᓗᐊ ᓯᕐᒥᖅ ᐊᒻᒪᓗ ᐊᒃᓵᔪᒃ ᐊᖅᑯᑎᖓ ᐊᔾᔨᐅᖏᑦᑐᓂᒃ ᐊᑐᕈᒥᓇᖅᑐᓂᒃ ᐱᕕᖃᖅᑎᑦᓯᕗᑦ (ᓄᓇᒥ ᐱᓱᒃᑏᑦ ᑲᓇᑕᒥ ᐊᔾᔨᓕᐅᒐᖅ).
ᐃᑳᖅᑐᖅ ᑰᖕᒥᒃ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᕿᑭᖅᑖᓗᖕᒥ (ᑯᕆᔅᑎᐊᓐ ᑭᒻᕗ ᐊᔾᔨᓕᐅᒐᖓ).
ᐋᓐᓂᐊᓯᐅᖅᑎ ᓰᓗ ᓯᒥᑦ ᐊᒻᒪᓗ ᐊᓐᓇᐃᓂᓐᖏᑕᖓ.
ᐊᕙᖕᒧᒐᕐᓂᖅ
ᐃᓅᓯᖅ ᓄᓇᕗᒻᒥ ᑕᐸᐃᕐᓇᑐᒻᒪᕆᐊᓘᒻᒪ ᐊᔾᔨᐅᒐᓂᓗ. ᐃᓱᒪᒋᔭᐅᓲᖑᔪᖅ ᐅᓄᖅᑐᓄᑦ ᑭᖑᓪᓕᖅᐸᐅᓂᖓᓂᒃ ᓯᓚᕐᔪᐊᒥ ᐃᓐᓂᑕᐅᕙᓪᓕᐊᓂᐊᖅᑐᓂᒃ.
ᓄᓇᕗᓕᒫᑲᓴᖅ ᓇᐹᖅᑐᖃᕐᓂᐅᑉ ᖁᓛᓃᑦᑐᖅ, ᓇᐹᖅᑐᖃᕐᓂᖅᑕᖃᓗᐊᓐᖏᑦᑐᖅ ᓄᓇᖓ. ᑎᖕᒥᐊᑦ, ᐆᒪᔪᑦ ᐊᒻᒪᓗ ᐱᕈᖅᑐᑦ ᐱᑕᓕᒻᒪᕆᐊᓘᔪᑦ ᓄᓇᕗᑦ ᓄᓇᖓᑕ ᐃᓚᖏᓐᓂ. ᐊᐅᔭᒃᑯᑦ ᖃᐅᒪᐃᓐᓇᖅᑐᓂ ᓯᕿᓐᓃᓇᕐᓂᖓ ᑕᐃᒫᑦᑕᐅᖅ ᐱᐅᔪᒻᒪᕆᐅᑎᒋᒻᒥᔪᖅ ᐅᑭᐅᒃᑯᑦ ᐱᖅᓯᕋᔪᓐᓂᖏᑐᑦ ᓴᓐᖏᔪᕐᔪᐊᕌᓗᓐᓂᒃ ᐃᒃᑮᓇᖅᑐᐊᓘᑎᓪᓗᒍ. ᓄᓇᕗᑦ ᓄᓇᒋᔭᐅᓪᓚᕆᑦᑐᖅ ᐊᔾᔨᒌᓐᖏᓂᖃᑦᓯᐊᖅᑐᓂ, ᓄᓇᖓᒍᑦ, ᓂᕐᔪᑎᖏᑦ, ᐃᓄᖏᑦ ᐊᒻᒪᓗ ᐊᕐᕌᒎᑉ ᐃᓗᐊᓂ ᖃᖓᐅᓕᕌᖓ.
ᐊᕙᖕᒧᒐᖅᑎᓄᑦ ᕿᓈᖃᑦᑕᓲᓄᑦ ᐱᒡᒐᓇᖅᑐᓂᒃ ᓇᖕᒥᓂᖅ ᐱᔪᓐᓇᕐᓂᕆᔭᒥᒍᑦ ᐊᒻᒪᓗ ᐃᖕᒥᒨᖓᔪᓂᒃ, ᓄᓇᕗᑦ ᐃᓅᓇᓱᐊᕐᕕᓴᒃᓯᐊᖑᕗᖅ. ᐊᑐᓂᑦ ᐊᕕᑦᑐᖅᓯᒪᓂᕆᔭᖏᓐᓂ ᓄᖅᑲᖓᓐᓇᖏᓪᓚᑦ ᑖᒃᑯᐊ ᐊᔾᔨᐅᖏᓐᓂᖏᑦ ᐱᐅᔪᕐᔪᐊᕌᓗᐃᑦ, ᐊᒻᒪᓗ ᓄᓇᒋᔭᐅᔪᖅ ᓄᖅᑲᖓᓐᓇᓐᖏᓚᖅ ᖃᐅᔨᓇᓱᐊᕐᓂᕐᒥᒃ.
ᓄᓇᕗᑦ ᓄᓇᒋᔭᐅᔪᖅ ᓯᓚᕐᔪᐊᒥ-ᑕᑯᔭᒃᓴᐅᓗᐊᓲᖑᓐᖏᑦᑐᓂᒃ ᐆᒪᔪᖏᓐᓂᒃ ᓄᓇᐅᑉ, ᑕᑯᓐᓇᕆᐊᕐᕕᒃᓴᖅ ᑎᖕᒥᐊᓂᒃ ᑕᑯᔭᐅᒐᔪᐃᑦᑐᓂᒃ, ᑕᑯᒥᓇᖅᑐᕐᔪᐊᕌᓗᐃᑦ ᒥᕐᖑᐃᓯᕐᕕᑦ, ᐱᒡᒐᓇᖅᑐᑦ ᑕᒻᒫᖅᓯᒪᕕᐅᔪᑦ ᐊᒻᒪᓗ ᐱᓱᕋᔮᕐᓂᐅᔪᑦ, ᖁᑦᓯᓂᖅᐹᒥᒃ ᑲᓅᒧᑦ ᐃᖏᕐᕋᕕᓕᒃ ᐊᒻᒪᓗ ᖃᔭᕐᓄᑦ, ᐃᖃᓪᓕᐊᕕᒃᓴᑦᓯᐊᕚᓗᒃ, ᐊᒻᒪᓗ ᖃᐅᔨᒪᔮᖑᔪᖅ ᓴᓇᐅᒐᖃᑦᓯᐊᑐᒻᒪᕆᐊᓘᓂᖓᓂᒃ.
ᑐᑭᓯᒋᐊᒃᑲᓐᓂᕐᕕᒃᓴᐅᔪᖅ ᓄᓇᕗᒻᒥ ᒥᕐᖑᐃᓯᕐᕕᖏᓐᓂᒃ ᐅᕙᓐᖓ http://www.nunavutparks.com/
ᕿᑭᖅᑖᓗᒃ
ᕿᑭᖅᑖᓗᒃ ᓄᓇᖃᕐᕕᐅᔪᖅ ᐃᖃᓗᓐᓄᑦ, ᓄᓇᕗᒻᒥ ᐊᖏᔪᖅᑳᒃᑯᕕᖓ, ᐊᒻᒪᓗ ᑖᓐᓇᑑᓪᓗᓂ, ᓄᓇᓕᐸᐅᔭᖅ. ᓄᓇᖓ ᑲᔾᔮᓇᖅᑐᕐᔪᐊᕌᓗᒃ ᐊᒻᒪᓗ ᓱᐃᓛᕿᕕᖃᐅᑦᓯᐊᖅᑐᖅ ᑭᓇᑐᐃᓐᓇᕐᓄᑦ ᑕᑯᔭᕆᐅᕈᒪᔪᒧᑦ ᓱᕐᕋᐃᑦᑐᒥᒃ.
ᐅᑭᐅᒃᑯᑦ, ᐅᓄᖅᑐᑦ ᓇᒧᓐᖓᐅᓇᖅᓯᑐᐊᕋᐃᒻᒪᑦ ᖁᐊᑐᐊᕌᖓ ᓄᓇᖓ ᐊᒻᒪᓗ ᑲᖏᖅᓱᖏᑦ ᕿᒧᑦᓯᖃᑦᑕᓯᓲᖑᔪᑦ ᐊᒻᒪᓗ ᖃᒧᑕᐅᔭᕋᑦᑐᑎᒃ ᓄᓇᖓᒍᑦ ᐃᒪᖓᒍᓪᓗ. ᓄᒃᑕᖃᑦᑕᕐᓂᖅ ᓄᓈᓗᐊᒍᑦ ᐊᖏᔪᕐᔪᐊᕌᓗᒃᑯᑦ ᑕᑯᓕᒪᓇᐃᑦᑐᓂᒃ ᑕᑯᕕᒃᓴᑦᓯᐅᕙᐅᕗᖅ ᑕᐸᐃᕐᓇᖅᑐᓂᒃ ᑭᓐᖓᕐᓂᒃ, ᓯᕐᒥᓂᒃ, ᐱᖃᓗᔭᓂᒃ, ᐃᓐᓈᕈᕐᓂᒃ ᐱᑭᐅᓂᒃ ᐊᒻᒪᓗ ᑕᕆᐅᕐᒥᐅᑕᕐᓂᒃ ᐆᒪᔪᓂᒃ.
ᐅᑭᐅᒃᑯᑦ ᐃᒃᑮᓇᖅᑐᒻᒪᕆᐊᓘᒍᓐᓇᖅᑐᖅ ᐃᔾᔨᖓᓄᑦ, ᐊᓄᕆᑐᔪᒻᒪᕆᐊᓘᓂᖓᓄᑦ ᐊᒻᒪᓗ ᐱᖅᑐᓂᒃ, ᑭᓯᐊᓂᓕ ᐅᓄᖅᑐᓄᑦ ᐊᑭᓴᖅᑑᑎᒍᑎᒋᒻᒥᔮ ᐊᐅᔭᒃᑯᑦ ᓯᕿᓐᓃᓐᓇᖃᑦᑕᕐᓂᖓ ᖃᐅᒪᐃᓐᓇᖃᑦᑕᕐᓂᖓ ᒪᑭᒪᓇᑦᓯᐊᕈᑎᒋᔮ ᓄᖅᑲᖓᓐᓇᖏᑦᓯᐊᖅᑐᖅ, ᑕᕆᐅᒃᑯᑦ ᖃᔭᖅᑐᕐᓂᖅ, ᐃᖃᓗᒐᓱᒃᑎᑕᐅᓂᖅ ᐊᑭᓖᓯᒪᓗᓂ, ᑐᒐᓕᓐᓂᒃ ᑕᑯᓐᓇᕆᐊᖅᓯᒪᓂᖅ ᐊᒻᒪᓗ ᐊᕐᕕᑕᕐᓂᖅ ᓇᓕᑐᐃᓐᓇᖏᓐᓄᑦ ᑖᒃᑯᐊ ᑲᓇᑕᒥ ᒥᕐᖑᐃᓯᕐᕖᑦ ᓄᓇᖏᓐᓄᑦ.
ᕿᑎᕐᒥᐅᓂ
ᓄᓇᖓ ᐊᑐᖅᑐᒻᒪᕆᐊᓘᔪᖅ ᐃᓕᖅᑯᓯᕐᒥᓂᒃ ᐃᓕᖅᑯᓯᕆᖃᑦᑕᖅᓯᒪᔭᒥᓂᓪᓗ. ᐊᔾᔨᒌᓐᖏᑦᑐᓂᒃ ᐃᓄᖃᐅᖅᑐᖅ ᑲᔾᔮᓇᖅᑐᕐᔪᐊᕌᓗᓐᓂ ᓄᓇᓂᓕ, ᐆᒪᔪᖃᐅᖅᑐᖅ ᐊᔾᔨᒌᔭᐅᓐᖏᑦᑐᓂᒃ ᓂᕐᔪᑎᓂᒃ, ᑕᒪᒃᑯᐊ ᑲᔾᔮᓇᕐᓂᐊᓗᖏᑦ ᑕᒫᓂᑐᐊᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᑕᖃᐅᖅᑐᖅ.
ᐃᓄᖏᑦ ᑕᒫᓂ ᓄᓇᓖᑦ ᐊᕐᕕᖅᑕᕐᓂᕆᓲᖏᑦ ᐊᓯᖃᓐᖏᑦᑐᑦ. ᑐᔾᔭᐃᓲᑦ ᑐᒥᖏᓐᓂᒃ ᑕᒪᒃᑯᐊ ᐃᓚᖏᑕ ᑕᐃᑦᓱᒪᓂᓴᕐᓂᖅ ᖃᐅᔨᒪᔮᖑᑦᓯᐊᖅᑐᓂᒃ ᕿᓂᖃᑦᑕᖅᑐᐊᓘᑎᓪᓗᒋᑦ ᐅᑭᐅᖅᑕᖅᑑᑉ ᓱᓪᓗᐊᓗᐊᓂᒃ ᐊᐃᔭᓕᐊᕋᓱᐊᖅᑐᑎᒃ. ᓱᓪᓗᐊᓗᒃ, ᖃᐅᔨᒪᔭᐅᖃᑦᑕᖅᓯᒪᓐᖏᑦᑐᖅ ᖃᓄᐃᓕᖓᒻᒪᖔᖅ, ᖃᐅᔨᒪᔭᐅᑦᓯᐊᖅᑐᖅ ᑕᒫᓂᒥᐅᓄᑦ, ᐊᑐᖃᑦᑕᖅᓯᒪᓪᓗᑎᒃ ᕿᓯᓐᓂᒃ ᐅᒥᐊᕐᓂᒃ, ᐅᒥᐊᕐᔪᐊᑯᑖᓂᒃ, ᐊᐅᓚᐅᑎᓕᓐᓂᒃ ᐅᒥᐊᕐᓂᒃ ᐊᒻᒪᓗ ᖃᒧᑕᐅᔭᕐᓂᒃ.
ᐊᕐᕕᑕᖅᑏᑦ ᑕᒪᐅᓈᖃᑦᑕᖅᓯᒪᒻᒥᔪᑦ ᐃᖏᕐᕋᓪᓗᑎᒃ ᓄᓇᖓᒍᑦ ᑰᑦᓯᐊᕚᓗᖏᑎᒍᑦ, ᑕᒪᐅᓐᖓᖓᔪᑦ ᓇᑎᕐᓇᓄᑦ ᐆᒪᔪᖃᐅᖅᑐᒧᑦ ᐊᒪᕈᕐᓂᒃ, ᐊᒡᖤᓂᒃ, ᐅᒥᖕᒪᑦ, ᑎᕆᒐᓐᓂᐊᑦ ᐊᒻᒪᓗ ᑐᑦᑐᑦ. ᓇᑎᕐᓇᖓ ᑕᓯᐊᕈᖃᐅᖅᑐᕐᔪᐊᒻᒪᕆᐊᓘᒻᒥᔪᖅ ᑕᓯᕐᓂᓪᓗ. ᓄᓇᖓ ᑎᖕᒥᐊᖃᕐᕕᓕᒃ, ᐆᒪᔪᖃᕐᕕᓕᒃ ᐱᔭᐅᑦᑕᐃᓕᔪᓂᒃ ᐊᒻᒪᓗ ᒥᕐᖑᐃᓯᕐᕕᖃᕐᒥᔪᖅ ᑲᓇᑕᐅᑉ ᒥᕐᖑᐃᓯᕐᕕᖓᓂ.
ᑭᕙᓪᓕᕐᒥ
ᑭᕙᓪᓕᖅ ᑕᒪᐅᓈᖓᔪᖅ ᑲᔾᔮᓇᖅᑐᕐᔪᐊᕌᓗᒃᑯᑦ ᓯᔾᔭᖓᒍᑦ ᑕᓯᐅᔭᕐᔪᐊᑉ ᐱᐅᓱᕆᔾᔪᑕᐅᓪᓗᓂ ᓄᓇᖓᑕ ᕿᑎᐊᓃᓐᓂᕋᕈᑕᐅᓲᖑᔪᖅ ᑲᓇᑕᒥ.
ᐅᐸᒐᑦᓴᑦᓯᐊᕙᒃ ᑭᓇᑐᐃᓐᓇᕐᒧᑦ ᐊᔾᔨᐅᖏᑦᑐᒥᒃ ᐃᓅᓇᓱᐊᕈᓯᖃᕈᒪᔪᒧᑦ ᐊᒻᒪᓗ ᖃᐅᔨᒋᐊᕈᒪᔪᓄᑦ ᓄᓇᒥ ᓱᕐᕋᐃᑦᑐᒥ ᐆᒪᔪᕐᔪᐊᖏᓐᓂᒃ ᖃᓂᑦᓴᕐᓗᑎᒃ ᐊᒻᒪᓗ ᓇᖕᒥᓂᖅ ᐱᓇᓱᐊᕐᓗᑎᒃ. ᐃᓄᖏᑦ ᑕᑯᕋᕐᓈᓲᑦ ᕿᓚᓗᒐᕐᓂᒃ ᑕᕆᐅᕐᒥᒃ ᐅᕝᕙᓘᓐᓃᑦ ᓄᓇᒦᒡᖢᑎᒃ ᖁᑦᓴᓇᓐᖏᑦᑐᒥ. ᑕᑯᕋᓐᓈᕕᒃᓴᐅᔪᖅ ᕿᓚᓗᒐᕐᓂᒃ ᑰᖓᒎᖅᑐᓂᒃ ᑕᒪᒃᑯᓄᓐᖓᖓᔪᓂᒃ ᑲᖏᕐᖣᒪᔮᖏᓐᓄᑦ. ᓇᓄᖃᐅᓲᖑᓪᓗᓂ ᓯᓈᖓ ᓂᕿᑦᓴᓯᐅᖅᑐᓂᒃ. ᐊᒻᒪᓗ ᑕᑯᔭᕆᐅᕐᓇᓯᐊᖅᑐᖅ ᑐᑦᑐᑦ ᑕᔾᔭᑎᓪᓗᒋᑦ ᑲᑎᕆᓃᑦ ᑕᑯᓐᓇᖅᑐᓄᑦ ᑕᐸᐃᖅᓯᒪᓗᐊᒧᑦ ᓂᓪᓕᐊᒋᐊᑐᓐᖏᔾᔪᑕᐅᓲᖑᔪᑦ.
ᑭᒡᓕᖓ ᓄᓇᓯᐊᖅ ᑲᖏᕐᔪᐊᖅ ᑰᖓ ᐆᒪᔪᖃᕐᕕᐅᓪᓗᓂ ᐱᕕᐅᑦᑕᐃᓕᒪᕕᒃ ᐃᓚᒋᔭᐅᓪᓗᑎᒃ ᑲᖏᕐᔪᐊᖅ ᑰᖓᑕ ᐊᕙᑖ ᐊᒻᒪᓗ ᓴᐳᔾᔭᐅᓯᒪᓪᓗᓂ ᑐᑦᑐᑦ ᑕᔾᔭᕐᕕᖓ ᑲᑎᕆᓃᑦ ᓇᐹᖅᑐᓕᐅᑉ ᑭᒡᓕᖓᓂᒃ ᓂᒋᐊᓂ ᐅᑭᐅᖅᑕᖅᑑᑉ ᓯᔾᔭᖓᑕ.
“ᑐᓴᖅᓴᑑᓚᐅᖅᑐᑦ ᕿᑭᕐᕋᖏᑦ ᕿᒻᒦᑦ ᐊᐅᓪᓚᑏᑦ ᐊᐳᒻᒥ” (ᒪᕆᔭ ᕗᕋᐃᓱ ᐊᔾᔨᓕᐅᒐᖓ).
