ᓄᓇᕗᑦ ᐊᑐᐃᓐᓇᐅᒪᑎᑦᓯᔪᖅ $3,000-ᓂᒃ $6,330-ᒧᑦ ᐊᕐᕌᒍᑕᒫᖅ ᐋᓐᓂᐊᓯᐅᖅᑎᓄᑦ ᐃᑲᔫᑎᒃᓴᐅᔪᓂᒃ ᐊᔪᕈᓐᓃᓴᒃᑲᓐᓂᕈᑎᒃᓴᖏᓐᓄᑦ.
ᐊᔪᕈᓐᓃᓴᒃᑲᓐᓂᕈᑎᒃᓴᑦ
ᔫᓂᐊᒃᑯᑦ ᐊᖏᖃᑎᒌᒍᑎᖏᑦ ᓂᕈᐊᕈᑕᐅᓚᐅᖅᑐᑦ ᔫᓂ 2008-ᒥ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᔪᐊᓂᒃᑯᓐᓄᑦ ᐊᑐᐃᓐᓇᐅᒪᑎᑦᓯᓂᕐᒥᒃ ᐊᕐᕌᒍᑕᒫᖅ ᓴᓂᕐᕙᖅᑕᐅᖃᑦᑕᕐᓗᑎᒃ ᑮᓇᐅᔭᑦ ᐃᑲᔫᑎᒃᓴᐅᔪᑦ ᐋᓐᓂᐊᓯᐅᖅᑎᓄᑦ ᐊᑭᓕᖅᓱᕆᐊᓕᖏᓐᓄᑦ ᐊᔪᕈᓐᓃᓴᒃᑲᓐᓂᕈᑎᒃᓴᖏᓐᓅᖓᔪᓄᑦ.
ᓄᓇᕗᑦ ᒐᕙᒪᒃᑯᖏᑦ ᐊᑐᐃᓐᓇᐅᒪᑎᑦᓯᓂᐊᖅᑐᑦ $3,000-ᓂᒃ $6,330-ᒧᑦ ᐊᕐᕌᒍᑕᒫᖅ ᐋᓐᓂᐊᓯᐅᖅᑎᓄᑦ ᐃᑲᔫᑎᒃᓴᐅᔪᓂᒃ ᐊᔪᕈᓐᓃᓴᒃᑲᓐᓂᕈᑎᒃᓴᖏᓐᓄᑦ ᐊᑭᓕᖅᓱᕆᐊᓕᖏᓐᓄᑦ. ᑎᑭᓯᒪᔪᑦ ᑖᒃᑯᓄᓐᖓᖓᓪᓗᑎᒃ ᐊᔾᔨᒌᓐᖏᑦᑐᓄᑦ ᐊᑭᓕᖅᓱᕆᐊᓕᓐᓄᑦ ᐃᖏᕐᕋᔾᔪᑎᓄᑦ ᓄᓇᓕᓐᓂᒃ ᑮᓇᐅᔭᑎᒍᑦ ᐃᑲᔪᖅᑕᐅᔭᕆᐊᓕᓐᓄᑦ ᑲᑎᒪᕐᔪᐊᕆᐊᖅᑐᖅᑐᖃᕆᐊᖃᖅᐸᓪᓘᓐᓃᑦ ᑲᑎᓐᖓᔭᖅᑐᕆᐊᖃᖅᑐᖃᖅᐸᓪᓘᓐᓃᑦ ᐃᓕᓐᓂᐊᖃᑎᒌᑦᑐᓄᑦ ᓄᓇᕗᑦ ᓯᓚᑖᓂ.
ᑮᓇᐅᔭᑦ ᐊᑐᖅᑕᐅᔪᓐᓇᕐᒥᔪᑦ ᐊᑭᓕᖅᓱᕆᐊᓕᓐᓄᑦ ᐅᖓᓯᑦᑐᒥᒃ ᐃᓕᓐᓂᐊᕈᑎᒋᔭᐅᓗᑎᒃ ᐊᒻᒪᓗ ᖃᕆᓴᐅᔭᒃᑯᑦ ᐃᓕᓐᓂᐊᕈᑎᒋᔭᐅᓗᑎᒃ. ᑕᒪᕐᒥᒃ ᓄᓇᓕᖏᑦ ᓄᓇᕗᑦ ᐊᑐᐃᓐᓇᖃᖅᑐᐃᓐᓇᐅᓕᖅᑐᑦ ᓱᒃᑲᔪᒥᒃ ᖃᕆᓴᐅᔭᒃᑯᑦ ᐊᖅᑯᑎᒥᒃ. ᐅᓄᖅᓯᕙᓪᓕᐊᑐᐃᓐᓇᖅᑐᑦ ᓄᓇᕗᒻᒥᐅᑦ ᐱᓇᓱᐊᖃᑦᑕᖅᑐᑦ ᐊᔪᕈᓐᓃᖅᓴᕈᑎᓂᒃ ᑖᒃᑯᓂᖓ ᐊᑐᐃᓐᓇᐅᒪᑎᑕᐅᔪᓂᒃ ᐃᓕᓐᓂᐊᕈᑎᓂᒃ ᖃᕆᓴᐅᔭᒃᑯᑦ.
