ᐃᓕᓐᓂᐊᖅᑏᑦ ᐃᓕᓐᓂᐊᖃᑦᑕᖅᑐᑦ ᐋᓐᓂᐊᕕᖕᒥ ᐊᒻᒪᓗ ᐃᓕᓐᓂᐊᕐᕕᖕᒥ.
ᐃᓕᓴᕆᔭᐅᔾᔪᑎᑖᕈᑎᒃᓴᖅ ᐋᓐᓂᐊᓯᐅᖅᑎᐅᓂᕐᒧᑦ ᓄᓇᕗᒻᒥ BScN ᐃᓕᓐᓂᐊᒐᒃᓴᖅ
ᖃᐅᔨᓴᖅᑐᓕᕆᓂᕐᒥᒃ ᐋᓐᓂᐊᓯᐅᖅᑎᐅᓂᕐᒧᑦ (ᐅᑭᐅᖅᑕᖅᑐᑎᒥ ᐋᓐᓂᐊᓯᐅᖅᑎᒃᓴᑦ) ᒪᓂᒪᑎᑕᐅᔪᖅ ᑲᑐᔾᔨᖃᑎᒌᒍᑕᐅᓪᓗᓂ ᑕᐅᕼᐊᐅᓯ ᐃᓕᓐᓂᐊᕕᔾᔪᐊᖓᓂᒃ. ᐃᓕᓐᓂᐊᒐᒃᓴᑦ ᐋᖅᑭᑦᑕᐅᓯᒪᓪᓗᑎᒃ ᐃᓕᓐᓂᐊᖅᑎᑦᓯᔾᔪᑎᒃᓴᐅᓪᓗᑎᒃ ᐃᓄᖕᓄᑦ ᐊᒻᒪᓗ ᐊᓯᖏᓐᓄᑦ ᓄᓇᕗᒻᒥᐅᓄᑦ ᐋᓐᓂᐊᓯᐅᖅᑎᐅᓂᕐᒧᑦ ᖃᐅᔨᒪᔭᐅᒋᐊᓕᓐᓂᒃ ᐃᖢᐊᖅᓴᐃᔾᔪᑎᒋᖃᑦᑕᕆᐊᓕᖏᓐᓂᒃ ᐃᓄᖏᓐᓄᑦ ᓄᓇᕗᑦ. ᓯᕗᓪᓕᖅᐹᑦ ᐅᑭᐅᑦ ᐱᖓᓱᑦ ᐃᓕᓐᓂᐊᖅᑕᐅᓲᖑᔪᑦ ᒫᓐᓇ ᒪᓂᒪᑎᑕᐅᔪᑦ ᓄᓇᑦᑕ ᐃᓕᓐᓂᐊᕐᕕᖓᒍᑦ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃᑯᑦ ᐃᖃᓗᓐᓂ.
ᐃᓕᓐᓂᐊᒐᒃᓴᓕᐊᖑᓯᒪᔪᑦ ᑐᕌᖓᓗᐊᓐᖑᐊᖅᑐᑦ ᐅᔾᔨᕈᓱᒋᐊᖅᓯᒪᓂᕐᒥᒃ ᐊᒻᒪᓗ ᐃᑉᐱᒍᓱᑦᓯᐊᓂᕐᒥᒃ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪᓗ ᐊᑐᐃᓐᓇᐅᒪᒍᑎᒃᓴᓂᒃ ᐋᓐᓂᐊᓯᐅᖅᑎᑦ ᓯᕗᓕᖅᑎᐅᓂᕐᒥᒃ ᐋᓐᓂᐊᖅᑐᓕᕆᓂᒃᑯᑦ ᐃᖢᐊᖅᓴᐃᔨᐅᓂᕐᒧᑦ ᓄᓇᕗᒻᒥ. ᐃᓕᓴᕆᔭᐅᔾᔪᑎᑖᕈᑎᒃᓴᖅ ᐋᓐᓂᐊᓯᐅᖅᑎᐅᓂᕐᒧᑦ ᓄᓇᕗᒻᒥ BScN (ᐅᑭᐅᖅᑕᖅᑐᒥ ᐋᓐᓂᐊᓯᐅᖅᑎᐅᓂᖅ) ᑐᓂᔭᐅᓂᐊᖅᑐᖅ ᑕᐅᕼᐊᐃᓯ ᐃᓕᓐᓂᐊᕕᔾᔪᐊᖓᓄᑦ ᐊᒻᒪᓗ ᐋᓐᓂᐊᓯᐅᖅᑎᒃᓴᐅᔪᑦ ᐊᔪᓐᖏᑦᓴᕆᐊᓕᖏᓐᓂᒃ ᐃᓕᓐᓂᐊᖅᑎᑕᐅᓗᑎᒃ ᐃᖢᐊᖅᓴᐃᖃᑦᑕᕈᓯᓪᓗᐊᑕᕐᓂᒃ ᖃᐅᔨᒪᓂᖃᖁᓪᓗᒋᑦ ᓄᓇᓖᑦ ᐋᓐᓂᐊᕕᖓᓂ. ᐃᓕᓐᓂᐊᕐᓂᖅ ᓯᑕᒪᓂᒃ ᐅᑭᐅᓂᒃ ᓯᕕᑐᑎᒋᔪᖅ ᐊᒻᒪᓗ ᐱᐊᓂᒃᑕᐅᒍᓂ ᐃᓕᓐᓂᐊᖅᑎ ᐊᑐᐃᓐᓇᐅᒪᓕᕋᔭᖅᑐᖅ ᐊᔪᓐᖏᑦᓴᕆᐊᓕᓐᓂᒃ ᐃᓕᓴᕆᔭᐅᔾᔪᑎᒻᒪᕆᒻᒥᒃ ᐋᓐᓂᐊᓯᐅᖅᑎᐅᓂᕐᒧᑦ ᓄᓇᕗᒻᒥ ᐃᓕᓐᓂᐊᓂᕐᒥᒃ, ᑕᒪᒃᑯᐊ ᐃᓕᓐᓂᐊᖅᑏᑦ ᐃᓱᓕᑦᓯᒍᒪᒍᑎᒃ ᓄᖅᑲᕈᓐᓇᕋᓗᐊᖅᑎᓪᓗᒋᑦ ᐅᑭᐅᓂᒃ ᐱᖓᓱᓂᒃ ᐊᓂᒍᐃᑦᓯᐊᕐᓗᑎᒃ ᐊᒻᒪᓗ ᐱᔪᓐᓇᖅᓯᑎᑕᐅᓇᔭᖅᑐᖅ ᐃᓕᓴᕆᔭᐅᔾᔪᑎᑖᕐᓂᕐᒥᒃ ᐋᓐᓂᐊᓯᐅᖅᑎᐅᓂᕐᒧᑦ. ᐃᓕᓐᓂᐊᖅᑏᑦ ᐱᕝᕕᖃᖅᑎᑕᐅᓂᐊᕐᒥᔪᑦ ᐋᓐᓂᐊᕕᖕᒥ ᖃᐅᔨᒪᔪᕐᔪᐊᒻᒪᕆᐅᔭᕆᐊᖃᕐᓂᕐᒥᒃ ᐊᔾᔨᒌᓐᖏᑦᑐᓂᒃ ᐃᖢᐊᖅᓴᐃᔾᔪᑎᓂᒃ ᐋᖅᑭᐅᒪᑦᓯᓂᕐᒥᒃ ᐊᑐᐃᓐᓇᐅᒪᒍᑎᒋᔪᓐᓇᓂᐊᖅᑕᖏᓐᓂᒃ ᐊᔾᔨᐅᖏᑦᑐᒥᒃ ᐊᔪᓐᖏᓂᕐᒥᒃ ᐃᖢᐊᖅᓴᐃᔾᔪᑎᐅᖃᑦᑕᖅᑐᓂᒃ ᓄᓇᕗᒻᒥ.
ᖁᑦᓯᓂᖅᐹᒥᒃ ᐃᓕᓴᕆᔭᐅᔾᔪᑎᑖᕈᑎᒃᓴᖅ ᐋᓐᓂᐊᓯᐅᖅᑎᐅᓂᕐᒧᑦ ᓄᓇᕗᒻᒥ BScN ᐃᓯᕈᓐᓇᐅᑎᒋᔭᕆᐊᓕᖏᑦ ᐃᓕᓐᓂᐊᑲᓐᓂᓂᕐᒧᑦ:
- ᐅᑭᐅᖃᕆᐊᓕᒃ 18-ᓂᒃ ᐅᖓᑕᓂᓘᓐᓃᑦ
- ᐅᖃᕈᓐᓇᕐᓂᖓ, ᐅᖃᓕᒫᕈᓐᓇᕐᓂᖓ ᐊᒻᒪᓗ ᑎᑎᕋᕈᓐᓇᕐᓂᖓ ᐃᓄᒃᑎᑐᑦ/ᐃᓄᐃᓐᓇᖅᑐᑦ (ᐃᑲᔫᑎᖃᒻᒪᕆᒃᑲᔭᖅᑐᖅ)
- ᑐᓂᓯᓗᓂ ᑎᑎᖅᑲᒥᒃ ᐱᔪᒪᔾᔪᑎᒥᒃ;
- ᑎᑎᖅᑲᓂᒃ ᑐᓂᔭᐅᓯᒪᓗᓂ ᖃᐅᔨᒪᔨᑕᕆᔭᐅᓂᐊᖅᑐᓂᒃ ᐃᖅᑲᓇᐃᔭᕐᕕᖕᒥᒃ ᐅᕝᕙᓘᓐᓃᑦ ᐊᐅᓚᑦᓯᔨᒥᒃ; ᐊᒻᒪᓗ
- ᑎᑎᖅᑲᒥᒃ ᐃᑲᔪᖅᑐᐃᔾᔪᑎᒥᒃ ᐊᕕᑦᑐᖅᓯᒪᓂᐅᔪᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑎᒪᔨᖏᓐᓂᒃ, ᓄᓇᓕᓐᓂ ᐋᓐᓂᐊᖅᑐᓕᕆᔨᒃᑯᑦ ᑲᑎᒪᔨᕋᓛᖏᓐᓂᒃ, ᐅᕝᕙᓘᓐᓃᑦ ᐃᖢᐊᖅᓴᐃᔨᒻᒪᕆᐅᔪᒥᒃ
- ᖁᑦᓯᓂᖅᓴᒥᒃ ᐃᓕᓐᓂᐊᖅᓯᒪᓗᓂ ᐃᓕᓐᓂᐊᓂᕐᒥᒃ 12 ᐃᓕᓴᕆᔭᐅᔾᔪᑎᑖᖅᓯᒪᒍᑎᒋᓗᒍ ᖁᕝᕙᐸᓪᓕᐊᒍᑎᑖᖅᓯᒪᓗᓂ ᓈᓴᐅᓯᕆᓂᕐᒧᑦ, ᖃᓪᓗᓈᑎᑐᑦ ᐊᒻᒪᓗ ᖃᐅᔨᓴᖅᑐᓕᕆᓂᕐᒥᒃ; ᐅᕝᕙᓘᓐᓃᑦ ᐱᐊᓂᒃᓯᒪᑦᓯᐊᕐᓗᓂ ᑐᓐᖓᕕᒋᔭᐅᔪᒥᒃ ᐊᕐᕌᒍᒥ ᐃᓕᓐᓂᐊᕆᐊᓐᖓᐅᒻᒥᒃ. ᓇᓕᒧᖏᓐᓂᓘᓐᓃᑦ ᐃᓕᓐᓂᐊᖅᓯᒪᔪᑦ ᐃᓱᒪᒃᓴᖅᓯᐅᕈᑕᐅᔪᓐᓇᕐᒥᔪᑦ.
- ᐱᖁᔭᓂᒃ ᓯᖁᒥᑦᓯᓚᐅᖅᓯᒪᓐᖏᓯᐊᕐᓗᓂ ᖃᐅᔨᓴᖅᑕᐅᓂᕐᒥᒍᑦ ᐸᓖᓯᒃᑯᓐᓂᒃ
