ᐊᐱᖅᑯᑕᐅᒐᔪᑦᑐᑦ

ᑕᒪᒃᑯᐊ ᓴᖅᑭᐅᒪᑎᑕᐅᕙᑦᑐᑦ ᓄᓇᕗᒻᒥ ᐋᓐᓂᐊᓯᐅᖅᑎᐅᓂᕐᒧᑦ ᐃᖅᑲᓇᐃᔮᒃᓴᑦ ᖃᐅᑕᒪᖅᑕᖅᑐᓅᑦ?

ᓄᓇᕗᒻᒥ ᒪᑐᐃᖓᔭᐅᖃᑦᑕᖅᑐᑦ ᐃᖅᑲᓇᐃᔮᒃᓴᒻᒪᕆᓐᓄᑦ ᖃᐅᑕᒪᖅᑕᖅᑎᓄᑦ ᐊᒻᒪᓗ “ᐃᓱᓕᑦᑕᕐᕕᓕᖕᓄᑦ” ᐋᓐᓂᐊᓯᐅᖅᑎᓄᑦ. ᑕᒪᕐᒥᑲᓴᒃ ᒪᑐᐃᖓᖃᑦᑕᖅᑐᑦ ᐃᖅᑲᓇᐃᔮᒻᒪᕆᐅᖃᑦᑕᖅᑐᑦ ᖃᐅᑕᒪᖅᑕᖅᑐᓄᑦ. ᓴᖅᑭᖅᑕᐅᓯᒪᔪᖅ “ᐃᓱᓕᑦᑕᕐᕕᓕᒻᒨᖓᑉᐸᑦ” ᐃᖅᑲᓇᐃᔮᖅ ᑕᒪᓐᓇ ᓇᓗᓇᐃᖅᑕᐅᓯᒪᓇᔭᖅᐳᖅ ᑖᒃᑯᓇᓂ ᐃᖕᒥᒃᑰᖓᔪᓂ ᐃᖅᑲᓇᐃᔮᒃᓴᐅᑉ ᒪᑐᐃᖓᓂᖓᑕ ᓇᓗᓇᐃᔭᖅᑕᐅᓯᒪᓂᖓᓂ. ᑕᖅᑭᓂᒃ ᐅᑭᐅᓂᓪᓘᓐᓃᑦ ᖃᑦᓯᓂᒃ ᓇᓗᓇᐃᖅᑕᐅᓯᒪᖃᓯᐅᑎᓗᓂ.

ᐱᒡᒐᓇᕐᓂᐊᖅᐹ ᐅᕙᓐᓄᑦ ᐃᓪᓗᒃᓴᖅᓯᐅᕐᓂᖅ ᐊᖏᕐᕋᕆᓇᔭᖅᑕᓐᓂᒃ?

ᐅᓄᖅᑐᑦ ᐋᓐᓂᐊᓯᐅᖅᑏᑦ ᒐᕙᒪᒃᑯᓐᓂᒃ ᐊᑭᒡᖠᒋᐊᖅᑕᐅᓯᒪᔪᓂ ᐊᖏᕐᕋᖅᑖᕆᐊᓐᖓᐅᑎᖃᕋᔪᑦᑐᑦ ᓱᓇᒃᑯᑖᖃᑦᓯᐊᖅᑐᓂ ᑲᑎᓐᖓᐅᑦᑐᓂ. ᑕᖅᑭᑕᒫᖅᓯᐅᑎᖓ ᐊᑐᖅᑐᐊᕈᑎᖓᓄᑦ ᐲᔭᖅᑕᐅᖃᑦᑕᓲᖑᓪᓗᓂ ᑮᓇᐅᔾᔭᒃᓵᖏᑎᒍᑦ. ᐊᐱᕆᓗᒍ ᐋᓐᓂᐊᓯᐅᖅᑎᓂᒃ ᐃᖅᑲᓇᐃᔮᖅᑖᑎᑦᓯᔨ ᖃᓄᐃᓕᖓᒻᒪᖔᖅ ᐃᓪᓗᖃᖅᑎᑦᓯᒍᑕᐅᔪᖅ ᓄᓇᓕᓐᓂ ᐃᖅᑲᓇᐃᔮᖅᑖᕆᓇᓱᐊᕈᒪᔭᓐᓄᑦ.

ᖃᓄᑎᒋ ᐃᒃᑮᓇᖅᓯᔭᑉᐸ ᐅᑭᐅᒃᑯᑦ?

ᑕᒪᐅᓐᖓᖓᑎᓪᓗᒍ ᓯᕕᑐᔪᕐᔪᐊᒻᒪᕆᐊᓗᒻᒧᑦ ᓄᓇᒋᔭᑦᑎᓐᓄᑦ, ᐊᔾᔨᒌᖃᑦᑕᓲᖑᓐᖏᑦᑐᖅ ᓯᓚᖓ. ᐅᑭᐅᑦ ᐃᔾᔨᓕᖅᑐᒻᒪᕆᐊᓘᒍᓐᓇᖅᑐᑦ - ᐅᑭᐅᖅᑕᖅᑐᓕᒫᒥ ᖁᑦᓯᓂᖅᐹᖅ ᓄᓇᓕᒃ ᐊᐅᓱᐃᑦᑐᖅ ᐃᔾᔨᖓᒍᑦ ᐃᒃᑮᓇᕐᓂᕆᔪᓐᓇᖅᑕᖓ ᓯᓚᓯᐅᑎᒃᑯᑦ ᔭᓐᓄᐊᓕᒥ -35ºC (-31ºF) ᐊᒻᒪᓗ ᔪᓚᐃᒥ ᐃᒃᑮᓇᖅᓯᖃᑦᑕᓲᖑᓪᓗᓂ ᓯᓚᓯᐅᑎᒃᑯᑦ 10ºC (50ºF). ᐊᐅᔭᒃᑯᑦ ᐃᒃᑮᓇᓗᐊᕌᓗᓐᖏᓂᖅᓴᐅᓲᖑᔪᖅ, ᑭᓯᐊᓂᓕ ᓯᓚᖓ ᐃᒃᑮᓇᖅᓯᑲᓪᓚᖃᑦᑕᓲᖑᒻᒥᔪᖅ ᑕᕝᕙᐃᓐᓇᖅ. ᐅᓄᖅᑐᓂ ᓄᓇᓕᓐᓂ ᐊᐅᔭᒃᑯᑦ ᓯᓚᖓ ᑎᑭᐅᑎᓯᒪᔪᓐᓇᖅᑐᖅ ᓯᓚᓯᐅᑎᒃᑯᑦ 20°C (68°F) ᐅᕝᕙᓘᓐᓃᑦ ᖁᑦᓯᓂᖅᓴᕈᓲᖑᒻᒥᔪᖅ. ᖃᐅᔨᒋᐊᕈᓐᓇᖅᑕᑎᑦ ᓯᓚᓐᓂᐊᕈᑏᑦ ᖃᕆᓴᐅᔭᒃᑯᑦ ᓄᓇᓕᒻᒧᑦ ᐃᓱᒪᒋᔭᕐᓄᑦ.

ᓯᓚᖓ ᓄᓇᒋᔭᑦᑎᓐᓂ ᓇᓂᐅᒐᓗᐊᖅᐸᑦ ᐅᓗᕆᐊᓇᖅᓯᒍᓐᓇᖅᑐᖅ ᑲᑎᓯᒪᑎᓪᓗᒋᑦ ᓯᓚᓐᓂᐊᕈᑎᒃᑯᑦ ᐃᒃᑮᓇᕐᓂᖓ ᐊᒻᒪᓗ ᐊᓄᕆᓂᖓᓄᑦ ᐃᒃᑮᓇᕆᐊᒃᑲᓂᖅᑎᑕᐅᓗᓂ. ᓄᓇᖃᖅᑐᒥᒃ ᐅᖃᐅᔾᔨᒋᐊᕈᑏᑦ ᖃᐅᔨᒪᒋᐊᒃᑲᓐᓂᖁᔭᐅᒍᑏᑦ ᓯᓚᒥᒃ ᐃᑉᐱᒋᔭᐅᑦᓯᐊᖏᓐᓇᕆᐊᓖᑦ ᒪᓕᒃᑕᐅᓯᐊᕐᓗᑎᒃ. ᐊᐅᔭᐅᓕᕌᖓᑦ ᓈᖕᒪᑦᓯᐊᖃᑦᑕᓲᖑᔪᖅ ᓱᐃᓛᕿᓂᕐᓄᑦ ᖃᓄᐃᑦᑐᑐᐃᓐᓇᕐᓄᑦ.

ᑲᑎᒻᒪᔭᕋ/ᐊᐃᑉᐸᕋ ᐃᖅᑲᓇᐃᔮᖅᑖᕆᐊᖃᕐᓂᐊᖅᑐᖅ. ᑕᒪᓐᓇ ᐊᑲᐃᓪᓕᕈᑕᐅᓂᐊᖅᑳ?

ᐊᑐᐃᓐᓇᐅᔪᑦ ᐃᖅᑲᓇᐃᔮᒃᓴᑦ ᐊᔾᔨᒌᖃᑦᑕᓲᖑᓐᖏᒻᒥᔪᑦ ᐊᖏᓂᖏᑎᒍᑦ ᓄᓇᓖᑦ. ᐊᖏᔫᑕᐅᓂᖅᓴᓂ ᓄᓇᓕᓐᓂ ᐃᖅᑲᓇᐃᔮᒃᓴᖅᑕᖃᕐᓂᖅᓴᖅ, ᐊᔾᔨᒌᓐᖏᓂᖅᓴᐅᓪᓗᑎᒃ ᐊᔪᓐᖏᔾᔪᑎᓕᓐᓄᑦ ᐃᖅᑲᓇᐃᔮᒥᒃ ᐱᔪᓐᓇᖅᑕᐅᔭᕆᐊᓖᑦ. ᐃᖅᑲᓇᐃᔮᒃᓴᑦ ᐃᓕᓴᐃᔨᓄᑦ, ᐃᖢᐊᖅᓴᐃᔨᐅᓂᕐᒧᑦ ᐊᔪᓐᖏᑐᕐᔪᐊᑦ ᐊᒻᒪᓗ ᓴᓇᔩᑦ ᓇᓗᓇᐃᒃᑯᑕᖃᕆᐊᓕᓐᓄᑦ ᐊᑐᐃᓐᓇᐅᒐᔪᑦᑐᑦ. ᑕᑯᒋᐊᕐᓗᒋᑦ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔮᒃᓴᑦ ᒪᓂᒪᑎᑕᐅᔪᑦ ᐅᕝᕙᓘᓐᓃᑦ ᐊᓯᖏᓐᓂ ᓴᖅᑭᖅᑕᐅᓯᒪᔪᑦ ᐃᖅᑲᓇᐃᔮᒃᓴᑦ ᓇᕿᑐᐃᓐᓇᕐᓗᒋᑦ ᑖᒃᑯᐊ ᓇᓗᓇᐃᖅᑕᐅᓯᒪᔪᑦ ᐊᑖᓂ ᓇᓕᑐᐃᓐᓇᖏᑦ.

http://www.gov.nu.ca/hr/site/jobs/index.shtml

http://www.nunatsiaq.com/CurentAds/jobs.html

ᕿᑐᕐᖓᒃᑳ ᐃᓕᓐᓂᐊᕆᐊᖃᑦᑕᕈᓐᓇᕋᔭᖅᑲ ᐃᖅᑲᓇᐃᔭᕐᕕᖕᒪ ᖃᓂᒋᔭᖓᓄᑦ?

ᓄᓇᕗᒻᒥ ᓄᓇᓕᓕᒫᑲᓴᑦ ᐃᓕᓐᓂᐊᕐᕕᖃᐅᖅᑐᑦ ᐃᓕᓐᓂᐊᕐᓂᓕᓐᓄᑦ ᐃᓕᓐᓂᐊᕆᐊᓕᓵᖅᑐᓂᒃ ᐃᓕᓐᓂᐊᕐᓂᓕᓐᓄᑦ 12-ᒥ. ᒥᑭᔫᑕᐅᓂᖅᓴᓂ ᓄᓇᓕᓐᓂ, ᐃᓕᓐᓂᐊᕐᕖᑦ ᐱᓱᕝᕕᒋᒌᓐᓇᐃᑦ ᐱᔨᑦᓯᖅᑕᐅᕕᖕᓄᑦ, ᐃᓚᒋᔭᐅᓪᓗᑎᒃ ᐋᓐᓂᐊᕐᕕᖏᑦ. ᐊᖏᔫᑕᐅᓂᖅᓴᓂ ᓄᓇᓕᓐᓂ ᐃᓕᓐᓂᐊᕐᕖᑦ ᕚᓯᖃᖃᑦᑕᓲᖑᔪᑦ ᐃᓕᓐᓂᐊᖅᑎᓂᒃ ᐃᓕᓐᓂᐊᕕᖕᒨᕈᔾᔨᖃᑦᑕᖅᑐᓂᒃ ᐊᖏᕐᕋᒥᒃ ᐅᑎᒧᓪᓗ ᖃᐅᑕᒫᑦ. ᑐᑭᓯᒋᐊᒃᑲᓂᕐᕕᒃᓴᐅᔪᑦ ᐃᓕᓐᓂᐊᕐᕕᓐᓅᖓᔪᓂᒃ ᓄᓇᓕᓐᓂ ᐱᔪᒐᕆᔭᕐᓂ ᐊᐱᕆᓗᒍ ᐋᓐᓂᐊᓯᐅᖅᑎᓄᑦ ᐃᖅᑲᓇᐃᔮᖅᑖᑎᑦᓯᔨ ᖃᐅᔨᔪᒪᓂᕋᕐᓗᒍ ᓄᓇᓕᒻᒥ ᐃᓕᓐᓂᐊᕐᕕᖕᒨᖓᔪᓂᒃ ᑐᓴᕆᐊᕐᕕᒃᓴᐅᔪᖅ.

ᐅᐃᕖᑎᑐᑦ ᐃᓕᓐᓂᐊᕈᑎᑕᖃᐅᖅᑲᑦ ᐃᓕᓐᓂᐊᕐᕖᑦ?

ᐃᖃᓗᓐᓂ ᐅᐃᕖᑎᑑᕆᐅᖅᓴᓂᕐᒥᒃ ᐃᓕᓐᓂᐊᕐᕕᑦᑕᓕᒃ ᐃᓕᓐᓂᐊᕆᐊᓕᓵᖅᑐᓂᒃ ᐃᓕᓐᓂᐊᕐᓂᓕᓐᓄᑦ 9-ᒥ. ᐃᓕᓐᓂᐊᓂᖅᑕᖃᓐᖏᑦᑐᑦ ᐅᐃᕖᑎᑐᑦ ᐊᑐᐃᓐᓇᐅᔪᓂ ᐊᓯᓕᒫᖏᓐᓂ ᓄᓇᕗᑦ ᓄᓇᓕᖏᓐᓂ.

ᐸᐃᕆᕕᖕᓂᒃ ᐊᑐᐃᓐᓇᐅᔪᖅᑕᖃᖅᑲ?

ᐸᐃᕆᕖᑦ ᐊᑐᐃᓐᓇᐅᖏᑦᑐᑦ ᓄᓇᓕᓕᒫᑲᓴᓐᓂ. ᑭᓯᐊᓂᓕ, ᐅᑕᖅᑭᔪᓄᑦ ᐃᓕᔭᐅᖃᑕᐅᔪᓐᓇᖅᑐᑎᑦ ᐸᐃᕆᕕᖕᓂ ᓄᓇᓖᑦ ᐃᓚᖏᓐᓂ. ᐊᐱᕆᓂᐊᖅᐸᑦ ᐋᓐᓂᐊᓯᐅᖅᑎᓄᑦ ᐃᖅᑲᓇᐃᔮᖅᑖᑎᑦᓯᔨ ᑐᑭᓯᒋᐊᒃᑲᓂᕐᕕᒃᓴᐅᔪᖅ.

ᐅᑭᐅᒃᑰᑦ ᑖᖏᓐᓇᖃᑦᑕᖅᑲ?

ᓇᓃᓐᓂᕆᔭᕐᓂᒃ ᒪᓕᒃᓯᒪᓇᔭᖅᑐᖅ. ᖁᑦᓯᑦᑐᒥ, ᓄᓇᓕᖓ ᖃᐅᓱᐃᑦᑐᖅ 24-ᓂᒃ ᐃᑲᕐᕋᓂᒃ ᑖᖏᓐᓇᓯᕙᑦᑐᖅ ᑕᖅᑭᓂᒃ ᐱᖓᓱᓂᒃ ᑕᒫᓂᒐᓚᒃ ᓅᕙᐃᒻᕙ 6-ᒥᒃ ᕕᑉᕗᐊᓕ 5-ᒧᑦ. ᑕᒫᓂᑦᓴᐃᓐᓇᖅ ᑕᖅᑭᓂ, ᑲᖏᕐᖠᓂᕐᒥ ᐱᖓᓱᓂᒃ ᐃᑲᕐᕋᓂ ᑕᒫᓂᒐᓚᒃ ᐅᓪᓘᖃᑦᑕᓲᖑᔪᖅ ᐅᑭᐅᓪᓗᐊᒃᑯᑦ ᐊᓪᓛᑦ. ᐃᓛᒃ ᓄᓇᕗᒻᒥ ᑖᒃᑯᐊ ᑖᖏᓐᓇᖃᑦᑕᕐᓂᖏᑦ ᐃᑲᔫᑎᖃᕐᒥᔪᑦ. ᑕᒪᒃᑯᐊ ᑕᑯᒥᓇᖅᑐᕐᔪᐊᕌᓗᐃᑦ ᑕᐸᐃᕐᓇᖅᑐᑦ ᐊᖅᓴᕐᓃᑦ, ᐅᕝᕙᓘᓐᓃᑦ ᖃᓪᓗᓈᑎᑐᑦ ᑕᐃᒎᓯᓖᑦ ᐋᕉᕋ ᕘᕆᐊᓕᔅ, ᖃᐅᒻᒪᐃᓯᒪᓲᖑᔪᑦ ᕿᓚᒻᒥᒃ. ᐃᓚᖏᑦ ᓂᐅᕐᕈᒍᑎᑐᐊᖃᖃᑦᑕᓲᖑᒻᒥᔪᑦ ᐅᑭᐅᒃᑯᑦ, ᑕᑯᕋᓐᓈᕆᐊᖅᑐᖅᓱᑎᒃ ᑕᒪᒃᑯᓂᖓ ᑕᑯᓕᒪᓇᐃᑦᑐᕐᔪᐊᓂ.

ᑎᑎᖅᑲᓂᐊᕐᕕᒃᑕᖃᐅᖅᑳ?

ᐃᓘᓐᓇᑦᓯᐊᑎᒃ ᓄᓇᓖᑦ ᑎᑎᖅᑲᓂᐊᕐᕕᒃᑕᖃᐅᖅᑐᑦ. ᐊᖏᕐᕋᒧᑦ ᐸᔪᑦᑎᕈᑕᐅᓲᖑᓐᖏᑦᑐᑦ. ᐃᑲᕐᕋᖏᑦ ᓄᓇᓕᓐᓂ ᐊᔾᔨᒌᓲᖑᓐᖏᑦᑐᑦ. ᑕᒪᕐᒥᒃ ᑎᑎᖅᑲᑦ ᖃᖓᑕᓲᒃᑰᖃᑦᑕᓲᖑᔪᑦ.

ᑮᓇᐅᔭᒃᑯᕕᒃᑕᖃᕐᓂᐊᖅᑳ ᐊᖏᕐᕋᖃᕐᕕᒋᓂᐊᖅᑕᕋ?

ᐱᖓᓱᑦ ᓄᓇᓖᑦ ᓄᓇᕗᒻᒥ ᑮᓇᐅᔭᒃᑯᕕᒃᑕᓖᑦ ᓄᓇᖏᓐᓂ. ᑮᓇᐅᔭᒃᑯᕕᒃᑕᓖᑦ CIBC-ᑯᓐᓂᒃ ᐃᖃᓗᓐᓂ ᐊᒻᒪᓗ ᑲᖏᕐᖠᓂᕐᒥ. ᑮᓇᐅᔭᒃᑯᕕᒃᑕᓖᑦ ᕈᐃᔪᓪ ᕙᐃᓐᒃᑯᓐᓂᒃ ᐃᖃᓗᓐᓂ, ᑲᖏᕐᖠᓂᕐᒥ ᐊᒻᒪᓗ ᐃᖃᓗᑦᑑᑦᑎᐊᒥ. ᑕᒪᕐᒥᑲᓴᑦ ᓄᓇᓖᑦ ᑮᓇᐅᔭᓂᒃ ᐲᖅᓯᕕᒃᑕᓖᑦ ATM ᓂᐅᕕᖅᑎᒃᑯᖏᑦ ᑯᐊᐸᖏᓪᓘᓐᓃᑦ. ᑮᓇᐅᔭᒃᑯᕕᖕᓂᒃ ᐊᑐᖃᑦᑕᓲᖑᔪᑦ ᓄᓇᓕᓐᓃᑦᑐᑦ ᑮᓇᐅᔭᒃᑯᕕᖃᓐᖏᑦᑐᓂ ᐅᖄᓚᐅᑎᒃᑯᑦ ᖃᕆᓴᐅᔭᒃᑯᓪᓗ ᐃᑭᐊᖅᑭᔾᔪᑎᒃᑯᑦ. ᐅᓄᖅᑐᑦ ᐃᓄᖏᑦ ᑮᓇᐅᔭᒃᑯᕕᖃᐅᖅᑐᑦ ᓯᓚᑖᓃᑦᑐᓂᒃ ᓄᓇᕗᑦ ᐊᑯᓂᐅᔪᒥᒃ ᑮᓇᐅᔭᒃᑯᕕᖕᒥ ᐊᑐᐃᓐᓇᖃᑦᑕᓲᒥᓂᒃ ᐊᑐᖃᑦᑕᕈᓐᓇᓲᖑᓪᓗᑎᒃ.

ᓱᐃᓛᕿᒍᑎᒃᓴᒐᓚᐃᓪᓕ ᐊᒻᒪᓗ ᐱᓐᖑᐊᖅᑐᓕᕆᓃᑦ?

ᐊᖏᔫᑕᐅᓂᖅᓴᓂ ᓄᓇᓕᓐᓂ ᓲᕐᓗ ᐃᖃᓗᓐᓂ ᑕᕐᕆᔭᕐᕕᒃᑕᓕᒃ, ᐱᖑᓐᐊᕐᕖᑦ, ᓄᓇᓕᓐᓂ ᐋᖅᑭᓱᖅᑕᐅᖃᑦᑕᓲᖑᔪᑦ ᐱᓐᖑᐊᕐᓃᑦ, ᓂᔾᔭᐅᓯᔭᕐᓃᑦ, ᑲᑐᔾᔨᖃᑎᒌᑦᑐᒐᓚᐃᑦ ᐊᒻᒪᓗ ᐃᒥᕋᓚᕝᕖᑦ ᓱᐃᓛᕿᒍᑕᐅᖃᑦᑕᓲᖑᔪᑦ. ᑭᓯᐊᓂᓕ, ᐃᓘᓐᓇᑲᓴᖏᑦ ᓄᓇᕗᒻᒥᐅᑦ ᖃᐅᔨᒪᓂᖃᑦᓯᐊᖅᑐᑦ ᓇᖕᒥᓂᖅ ᓱᐃᓛᕿᒍᑎᒃᓴᓕᐊᕆᔭᒥᓂᒃ ᖁᕕᐊᒋᔭᒥᒍᑦ ᐊᑐᖃᑦᑕᓲᖑᔪᑦ ᓂᕆᖃᑎᒌᑦᑎᑦᓯᓪᓗᑎᒃ, ᐱᓐᖑᐊᕐᓃᑦ ᐱᓐᖑᐊᕈᓯᕐᓂᒃ ᐅᓐᓄᒃᑯᑦ ᐊᒻᒪᓗ ᐊᖏᕐᕋᒥ ᑲᑎᑎᑦᓯᖃᑦᑕᕐᓃᑦ ᓄᓇᖅᑲᑎᒋᔭᒥᓂᒃ.

ᒥᑭᑦᑑᑕᐅᓂᖅᓴᓂ ᓄᓇᓕᓐᓂ ᐱᓐᖑᐊᕐᓃᑦ ᐊᑐᖅᑕᐅᒐᔪᑦᑐᑦ ᐊᒻᒪᓗ ᓂᕆᕕᔾᔪᐊᑎᑦᓯᓂᖃᓲᖑᒻᒥᔪᑦ. ᓄᓇᓕᓕᒫᑦ ᐱᓐᖑᐊᕐᕕᖃᐅᖅᑐᑦ. ᐃᓘᓐᓇᑲᓴᑎᒃ ᐱᖃᐃᓕᓴᕐᕕᖃᐅᖅᑐᑎᒃ ᐃᓕᓐᓂᐊᕕᖏᓐᓂ ᐊᒻᒪᓗ ᕼᐊᑭᕐᕕᖕᓂᒃ. ᐊᖏᔫᑕᐅᓂᖅᓴᓂ ᓄᓇᓕᓐᓂ ᐃᖃᐃᓕᓴᕐᕕᖃᐅᖅᑐᑦ ᐊᒻᒪᓗ ᐊᓯᖏᓐᓂᒃ ᓱᐃᓛᕿᕕᖕᓂᒃ.

ᓯᓚᒥ ᓱᐃᓛᕿᒍᑕᐅᔪᓐᓇᖅᑐᑦ ᐃᓚᖏᑦ ᐃᖃᓪᓕᐊᕐᓂᖅ, ᐊᖑᓇᓱᓐᓂᖅ ᐊᒻᒪᓗ ᐱᓱᕋᔮᓐᓂᖅ.

ᑕᓚᕖᓴᒃᑯᑦ ᑲᐃᕗᖃᕈᓐᓇᖅᑯᖓ?

ᑕᓚᕖᓴᒃᑯᑦ ᑲᐃᕗᖃᕈᓐᓇᐅᑎᓖᓐᓇᐃᑦ ᓄᓇᓕᓕᒫᑦ ᓄᓇᓕᖕᒥᓂ ᐱᔨᑦᓯᕋᖅᑎᒋᔭᒥᒍᑦ.

ᓱᒃᑲᔪᒥᒃ ᖃᕆᓴᐅᔭᒃᑯᑦ ᐃᑭᐊᖅᑭᔾᔪᑎᑖᕈᓐᓇᖅᑯᖓ?

ᓱᒃᑲᔪᒥᒃ ᖃᕆᓴᐅᔭᒃᑯᑦ ᐃᑭᐊᖅᑭᔾᔪᑎᓖᓐᓇᐃᑦ (ᐅᐊᔭᖃᕆᐊᑐᓐᖏᑦᑐᓂᒃ) ᓄᓇᓕᓕᒫᑦ ᓄᓇᓕᖕᒥᓂ ᐱᔨᑦᓯᕋᖅᑎᒋᔭᒥᒍᑦ.

ᓇᑦᓴᕈᓐᓇᖅᑲᕌ ᓄᓇᓯᐅᑎᒐ ᐅᓯᑲᑦᑕᐅᑎᒐᓘᓐᓃᑦ?

ᐊᖅᑯᑎᖃᐅᓐᖏᑦᑐᑦ ᐊᑐᕆᐊᓂᒃ ᓄᓇᕗᒻᒥ ᓄᓇᓕᓐᓅᖓᔪᓂᒃ ᖃᓪᓗᓈᓄᑦ ᑲᓇᑕᒥ. ᓄᓇᓯᐅᑏᑦ ᐊᒻᒪᓗ ᐅᓯᑲᑦᑕᐅᑏᑦ ᐅᓯᔭᐅᕙᑦᑐᑦ ᓄᓇᓕᓕᒫᑲᓴᓐᓄᑦ ᐊᕐᕌᒍᑕᒫᖅ ᐅᒥᐊᕐᔪᐊᒃᑰᖅᑎᑕᐅᓪᓗᑎᒃ. ᐃᓘᓐᓇᑲᓵᑎᒃ ᒥᑭᔫᑕᐅᓂᖅᓴᓂ ᓄᓇᓕᓐᓂ ᓄᓇᓯᐅᑎᖃᓐᖏᑦᑐᑦ ᐅᓯᑲᑦᑕᐅᑎᓂᓪᓘᓐᓃᑦ. ᑭᓯᐊᓂᓕ ᐃᓄᖏᑦ ᖃᒧᑕᐅᔭᖃᐅᖅᑐᑦ ᐅᕝᕙᓘᓐᓃᑦ ᓯᑕᒪᓕᓐᓂᒃ (ᑕᒪᒃᑮᓂᓪᓘᓐᓃᑦ). ᐊᖏᔫᑕᐅᓂᖅᓴᓂ ᓄᓇᓕᓐᓂ ᓲᕐᓗ ᐃᖃᓗᓐᓂ ᐊᒻᒪᓗ ᑲᖏᕐᖠᓂᕐᒥ ᐅᓄᖅᑐᑦ ᓄᓇᓯᐅᑎᖃᐅᖅᑐᑦ ᐅᓯᑲᑦᑕᐅᑎᓂᓪᓘᓐᓃᑦ.

ᐃᒥᕋᓚᕝᕕᖃᐅᖅᑳᑦ ᓄᓇᕗᒻᒥ ᓄᓇᓕᖏᑦ?

ᓚᐃᓴᓕᓐᓂ ᐃᒥᕋᓚᕝᕕᓖᑦ ᐃᖃᓗᓐᓂ, ᑲᖏᕐᖠᓂᕐᒥ ᐊᒻᒪᓗ ᐃᖃᓗᑦᑑᑦᑎᐊᒥ.

ᕙᐃᓂᑖᕈᓐᓇᖅᑯᖔ ᕕᐊᒥᓪᓘᓐᓃᑦ ᓄᓇᓐᓂ?

ᐱᖓᓲᓕᖅᑲᖓᔪᑦ ᐊᐅᓚᑦᓯᔾᔪᑕᐅᔪᑦ ᓄᓇᓕᓐᓂ ᓄᓇᕗᒻᒥ ᐃᒥᐊᓗᒻᒥᒃ ᑎᒍᒥᐊᕐᓂᖅ ᐊᒻᒪᓗ ᐃᒥᕋᓚᓐᓂᖅ ᐱᓕᕆᐊᖑᓂᖓ. ᓄᓇᓖᑦ ᐃᓚᖏᑦ ᐃᒥᐊᓗᖃᕆᐊᖃᓐᖏᑎᑕᐅᔪᑦ, ᓄᓇᓖᑦ ᐃᓚᖏᑦ ᒪᓕᒐᖃᐅᖅᑐᑦ ᐃᒥᐊᓗᖃᕈᓐᓇᐅᑎᖃᕆᐊᖃᕐᓂᕐᒧᑦ ᓄᓇᓕᓐᓂ ᐃᒥᐊᓗᓕᕆᔨᒃᑯᑦ ᑲᑎᒪᔨᕋᓛᖏᑎᒍᑦ ᐊᒻᒪᓗ ᐃᒥᐊᓗᒻᒥᒃ ᓂᐅᕕᖃᑦᑕᕈᓐᓇᓯᐊᖅᑐᑦ ᒪᓕᒐᖃᓐᖏᓯᐊᒻᒪᕆᑦᑐᑎᒃ ᓄᓇᓖᑦ ᐃᓚᖏᑦ ᐊᒻᒪᓗ ᐊᑐᖅᑕᐅᔪᓐᓇᖅᑐᑎᒃ ᒪᓕᒋᐊᓕᓐᓂᒃ ᒪᓕᓪᓗᑎᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᐱᖁᔭᖏᓐᓂᒃ. ᓄᓇᓖᑦ ᓇᓗᓇᐃᖅᑕᐅᓯᒪᓲᑦ ᖃᓄᐃᓕᐅᕈᒪᓂᖏᓐᓂᒃ ᖃᐅᔨᒋᐊᕐᕕᐅᓯᒪᓪᓗᑎᒃ ᐃᓱᒪᖅᓲᑎᖃᖅᑐᑎᒃ ᓄᓇᓕᖕᒥᑎᒍᑦ.

ᓂᐅᕕᕐᕕᖃᓐᖏᑦᑐᖅ ᐃᒥᐊᓗᑦᑖᕕᖕᒥᒃ ᓄᓇᕗᒻᒥ. ᐃᒥᐊᓗᖃᑦᑕᕈᒪᔪᑦ ᓇᖕᒥᓂᖅ ᑎᑭᓴᐃᖃᑦᑕᕆᐊᓖᑦ ᐃᒥᐊᓗᓐᓂᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᑲᒥᓴᒃᑯᖏᑎᒍᑦ ᐅᕝᕙᓘᓐᓃᑦ ᐃᒥᐊᓗᖃᕈᓐᓇᐅᑎᑖᖅᓯᒪᓗᑎᒃ.

ᖃᓪᓗᓈᑦ ᐅᖃᐅᓯᖓ ᐊᑐᕐᓗᒍ ᐱᓕᕆᔪᓐᓇᓂᐊᖅᐳᖓ?

ᓄᓇᕗᑦ ᐱᖓᓱᓂᒃ ᐃᓕᓴᕆᔭᐅᓯᒪᔪᓂᒃ ᐅᖃᐅᓯᓕᒃ - ᐃᓄᐃᑦ ᐅᖃᐅᓯᖓ (ᐊᑐᖅᑕᐅᓂᖅᐹᖑᓲᖑᓪᓗᓂ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᑦ), ᖃᓪᓗᓈᑎᑐᑦ ᐅᐃᕖᑎᑐᓪᓗ. ᐃᒪᐃᒐᔪᑦᑐᓂᓗ, ᐋᓐᓂᐊᖃᕐᓇᖏᑦᑐᓕᕆᓂᖅ ᐱᓕᕆᐊᖑᕙᑦᑐᖅ ᖃᓪᓗᓈᑎᑐᑦ ᑐᓵᔨᖃᖅᑎᑕᐅᓲᖑᓪᓗᑎᒃ ᑕᐃᒃᑯᐊ ᑐᓵᔨᖃᕈᒪᔪᑦ ᐃᓄᐃᑦ ᐅᖃᐅᓯᖓᓂᒃ ᐊᒻᒪᓗ ᐅᐃᕖᑎᑐᑦ.

ᐅᐃᕖᑎᑐᑦ ᐱᓕᕆᔪᓐᓇᓂᐊᖅᐳᖔ?

ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓪᓗᖁᑎᕗᑦ ᐅᐃᕖᑎᑐᑦ ᐊᑐᖃᑦᑕᖏᑦᑐᑦ ᐱᓕᕆᔾᔪᑕᐅᓪᓗᓂ.

ᑭᒃᑯᑦ ᒪᓕᒐᕐᓂᒃ ᒪᓕᒃᑎᒃᓯᔨᐅᒻᒪᑕ ᓄᓇᓕᓐᓂ?

ᐸᓖᓯᒃᑯᑦ ᒪᓕᒐᕐᓂᒃ ᒪᓕᒃᑎᒃᓯᔨᐅᖃᑦᑕᖅᑐᑦ ᓄᓇᓕᓕᒫᓂ. ᐃᓚᖏᑦ ᓄᓇᓖᑦ ᒐᕙᒪᖏᑦ ᐸᓖᓯᓐᖑᐊᖃᕐᒥᔪᑦ ᓄᓇᓖᑦ ᒪᓕᒐᕋᓛᖏᓐᓂᒃ ᒪᓕᒃᑎᑦᓯᔨᐅᔪᓂᒃ.