Bella Kapolak Alec Kapolaklu
400-nguyurnaqhiut piipinnuat inuuvaktut ukiuq tamaat Qikiqtani Aanniarviani Iqalungni kivgaqtuiyumik Nunavunmik tamaanik.
Ilihimayakhat
Uuktugakhat Nunavunmi Munarhiit havaakhait upluq tamaat havangnaqtuut?
Nunavut angmaumayuqaqtuq upluq tamaat havangnaqtunik “havakafuktukhaniglu” munaqhinik. Tamaitavyak angmaumayut upluq tamaat havangnaqniaqtut. Uktuutikhaq havaakhamut havakafuktuuniaqqat naunaiqhimaniaqtuq taffumunga havaap naunaitkutaanut. Tatqiqhiutit ukiulluuniit naunaiqtauhimaniaqtut.
Ayurharniaqqiik aimavikhaqhiurlungaa?
Tamaitavyak munarhit aimaviqaqpaktut hivullirmik kavamatkut akikhilaaqhimayainni tamayalingni igluqpani. Tatqiqhiut tamaat akiiyaqtauvaktut havaktup akiliuhiakhaanit. Apirilugu Munaqhikhanik Havaktukhaqhiuqti iglukhatigut talvani nunami ukturumayarni.
Qanuraaluk itjiguqpakpa ukiuraalungmi?
Anginianit aviktuqhimayup, hila atjiginngitpiaqtuq. Ukiumi piuminaittaqtuq – Ukiuqtaqqiyauyumi Qauyuittumi Janualimi qiqaunia -35ºC (-31ºF) Jualimittauq itquhia 10ºC (50ºF). Auyami qiqaitqiyauyuq, kihimi atauttikkut niglaqtaqtuq. Amihuni nunani auyami upluq unarnia tikittaqtuq 20°C (68°F) unatqiyauluniluuniit. Qinirlugu Hilaliqiyit qaritauyakkut unarniinnik nunait ihumagiyaqqit.
Itquhiit humiliqaak aviktuqhimayumi qayangnaqhittaqtut niglaumania katakkangat anuqhilaqiqpiaqhunilu. Nunamiut uqauhiit hilap mighaagut maliguayauyukhat. Auyami tatqiqhiutit hulilukaaknaqtut.
Aippara/tuvaqatiga havaakhailliuqtuq. Ayurnarniaqqaa?
Havaakhaqarniit nunait atayut aktilanganut nunaup. Angitqiat nunait havaakhaqarluaqtut, aallatqiinik ayunngittunik. Havaakhat ilihaiyinut, aanniarnaqtuliriyinut, havaktinullu qahakhivaktut. Qinirlugu Kavamat Nunavut hadja inukhaqhiuqtut havaakhanut uvvaluuniit hakyaiqtauhimayunik havaanik ukua qaritauyakuurviit naqillugit.
http://www.gov.nu.ca/hr/site/jobs/index.shtml
http://www.nunatsiaq.com/CurentAds/jobs.html
Nutaqqatka ilihariaqniaqqaat havarvingma hanianii?
Tamaitavyak Nunavut nunait iliharviqaqtut inikhaqaqhutik sikuulihaanit 12-mut. Mikitqiani nunani iliharviit qanittut pihuguminaqhutik, pivikhanit, ilautilugit munaqhiqarviit. Angitqiani nunani, pasit agyaqpaktut aimaviinnit iliharvingmut utimullu upluq tamaat. Ilitturiyumirumaguvit iliharvitigut nunami ukturumayarni apirilugu Munarhikhaqhiuti taffuma iliharviup turaqtittivianik.
Viuviutut uqauhirmik ilihagakhaqaqqaat iliharviit?
Iqaluit Vuivuituinnaq iliharviuyuq sikuulihaanit 12-mut. Iliharvikhaittuq Vuivuitut ahini nunani Nunavunmi..
Nutaqqiqiviqaqqaa?
Nutaqqiqiviqaqtut tamaitavyak nunait. Kihimi, utaqqiyuqarunaqhiuq inikhanik ilangini nunani. Apirilugu Munarhikhaqhiuqti.
Taaqqaa ukiuraaluuk?
Humiitkuvit taarnia aallanngayuq. Qutiktumi Ukiuqtaqtumi, Auyuittuq taaqpaktuq 24-ni ikaknini pingahuni tatqiqhiutini Nuvampa 6-mit Fivyuali 5-mut. Ahiattauq, Kangiqhiniq qauvakhuni pingahuniqaak ikakninik ukiuraaluugaluaqtillugu. Nunavunmi ukua uplut taarniit ilauqtauvaktut. Hakhaliat piniqtut, qaumautivaktut. Ilangit inuit pulaqpaktut ukiumi, takuyumaplugit aglingnaqtut.
Titiqqat tikiqattaqqaat?
Tamaita nunait titiqqanik tikilviuqattaqtut. Aimavinut kihimi agyaqtauyuittut. Ikakniit titigaqarviit nunani aallanngayunaqhiut. Titiqqat tikitpaktut tingmitikkut.
Maniqarviqarniaqaa nunakhamnii?
Pingahut nunait Nunavunmi maniqarvilgit. CIBC Iqalungniittuq Kangiqhinirmilu. Royal Banktauq ittuni Iqalungni, kangiqhinirmi Iqaluktuttiamilu. Tamaitavyak nunait maniktarvilgit Nuatan Niuvirviini Kuapmiluuniit. Maniqarvilgit nunani maniqarviqanngittumi talafuutikkut qaritauyakkulluuniit maniliqivaktut. Amihut inuit inmi maniqarviqaqpaktut maniqarvingmi Nunavut hilataani akuni maniqarviqarnaqtumik.
Huliluqaarutikhattauq tuninguiqtirutit?
Angitqiani nunani Iqaluktut piksasuurvilik, ulapqiqattaqhutik, qunngiaqtittiqattaqhutik, atuqtuuyaqtuniglu, hulilukaakviqaqhutik ilauyumayunut, imirviqaqhunilu. Kihimi, amihutqiat Nunavunmiut inmikkut tuninguiqtirutikhakhiuqpaktut niriqatigiikhutik, ulapqiuyaqhutik aimavingmingnilu pulaqhutik huliplutik.
Mikitqiani nunani ulapqiut aulayuittut niriqatigiiktullu quviahuutauplutik. Tamaita nunait ulapqivilgit. Tamaitavyak iliharviit ulapqiviqaqhutik haakiqviqaqhutiglu. Angitqiat nunait ikaiqharviqaqhutik aallaniglu huliluqarvinik.
Hilami tuninguiqtirutikhat iqalukhiurniq, angunahuarniq pihuuyarniglu.
Alguyakkut tiiviiniktaqiik?
Alguyakkut tiiviilik tamainni nunani tiiviiliriyinit.
Kayumiktumik qaritauyakkuurutiniktaqiik?
Kayumiktumik qaritauyakkuurutiningnaqtuq (alguyaittunik) tamainni nunani qaritauyaliriyinit.
Akhaluutiga nakhaqtaqqiguu?
Apqutiqanngittuq atauyunik Nunavunmit autsaimut Kanatami. Akhaluutit agyaqtauttaqtut tamaivyangnut nunanut umiakkut. Inuit mikitqiani nunani akhaluutiqanngittut. Kihimi amihut inuit sikiitulgit haantamigluuniit ilangit tamarmingnik piqaqhutik. Angitqiani nunani Iqalungni Kangiqhinirmilu amihut inuit nanminiq akhaluutilgit.
Imirviqaqqa Nunavunmii?
Laisiqaqtunik imirvilik Iqalungni, kangiqhinirmi Iqaluktuttiamilu.
Niuviqtaqiik wainmik piamigluuniit nunanii?
Pingahuuyut itquhiit nunait Nunavunmi imiqtigut imirnikkullu. Nunalik imiqarnanngittunik, nunait talvani inuit angiqtauhimayut nunaup Imiliriyiinit Katimayiinnit aquiqtuqtaqtut. Nunallu aallat angmaumaplutik imirmut niuviqtauttaqhuni atuqtaulunilu maliktaulutik Nunavut Imiqtigut Maligaa. Nunait itquhiit ihumaliurutauyut nunaqaqtunit piumayamiktitut.
Niuvirviqanngittuq imirnik Nunavunmi. Imngit inmi niuqqagakhait aquiqtuqtauvaktut Nunavut Imiliriyiinnit Kamisanmit uvvaluuniit tikiutjauplutik angiqtauhimajutigut.
Havaktaaqqiik Qablunaatuut?
Nunavut pingahunik ilitarimayauyunik uqauhilik – Inuit uqauhiat (Inuktitulluaq Inuinnaqtulluarlu), Qablunaatun Vuivuitullu. Imaitpaktuq, aanniarnaqtuliriniq aulayuq Qablunaatun numiktiriyiqaqhuni tapkununga piumayunik Inuit uqauhiagut Vuivuitulluuniit.
Vuivuitun havaktaaqqiik?
Havarvivut huli Vuivuitun uqauhiqaqhuni havarviunngittut.
Kitkut palihimqtuivat nunani?
Palihimat palihimiqtuiyut tamainni nunani. Ilangit nunait Hamalait Maligaliriyiqaqtut maliguaquiyit nunaup maligainnik.
